جعلی ڈگریوں والے ہمارے نمائندے ۔۔۔!

کچھ عرصے قبل سپریم کورٹ نے پیپلز پارٹی کے رہنماؤں جمشید دستی اور نذیر جٹ کو جعلی ڈگریوں کی بنا پر نااہل قرار دے دیا تھا جس کے انہیں اپنی وزارتوں سے مستعفی ہونا پڑا مگر پیپلز پارٹی نے جانبداری کا مظاہرہ کرتے ہوئے باوجود اس کے کہ ان کی تعلیمی اسناد جعلی ہیں انہیں ضمنی انتخابات کا ٹکٹ دے دیا اور اب یہ حضرات ایک مرتبہ پھر عوامی نمائندے کی صورت میں عوام کے سامنے خود کو ووٹ کا صحیح حقدار ثابت کرنے پر مصر ہیں اور انہیں امید ہے کہ عوام انہیں ہی اپنا نمائندہ منتخب کرے گی-

یہاں پر یہ بات قابل غور ہے کہ ہمارے لیے عوامی نمائندے کے طور پر ان جعلی ڈگریوں کے حامل افراد کے علاوہ کوئی فرد نہیں ہے اور ان کا اتنا پرامید نظر آنا بھی ہماری لاپرواہی کا باعث تو نہیں؟ یہ بات بھی قابل ذکر ہے کہ صرف اس عمل میں ان امیدواران کا ہی قصور نہیں اس میں وہ پارٹی بھی برابر کی شریک ہے جس نے انہیں انتخابی ٹکٹ سے نوازا ہے اور ہمارے وزیراعظم صاحب کا کہنا یہ ہے کہ انہیں ان کی جعلی اسناد سے کوئی فرق نہیں پڑتا اور باقاعدہ وہ انہیں کامیاب کرنے کے لیے سرکاری خرچ پر متعلقہ حلقوں میں جلسوں سے خطاب کر کے وہاں کی عوام کو نئے وعدوں سے بھی نواز رہے ہیں٬ مگر شاید واقعی ان کو جعلی اسناد سے کوئی فرق نہ پڑتا ہو مگر کیا عوام کو پڑتا ہے؟ یا پھر عوام بھی اپنے لیے ایسے ہی نمائندے منتخب کرنا چاہتی ہے جو کہ جعلی ڈگریوں کے حامل ہوں؟

آپ اس بارے میں کیا کہتے ہیں؟