پاکستانی اداکار حارث وحید نے اپنے حالیہ عمرہ سفر کے دوران والد کے ساتھ پیش آنے والے ایک دل کو چھو لینے والے واقعے کی ویڈیو سوشل میڈیا پر شیئر کی ہے۔
ویڈیو کے آغاز میں دیکھا جا سکتا ہے کہ حارث وحید اپنے والد کو مکہ مکرمہ میں وہیل چیئر پر لے جا رہے ہیں جبکہ چند لمحوں بعد اسی ویڈیو میں ان کے والد اپنے قدموں پر کھڑے ہو کر خود چلتے ہوئے عمرہ ادا کرتے نظر آتے ہیں۔
انسٹاگرام پر ویڈیو شیئر کرتے ہوئے حارث وحید نے کیپشن میں لکھا میرے ابّا وہیل چیئر پر گئے اور چلتے ہوئے واپس آئے۔یہ ویڈیو سوشل میڈیا صارفین کے دلوں کو چھو گئی جس پر ہزاروں افراد نے محبت اور دعاؤں کا اظہار کیا۔
ایک صارف نے لکھا یہ ویڈیو دیکھ کر آنکھوں میں آنسو آ گئے، وہیل چیئر پر مکہ جانا اور چلتے ہوئے واپس آنا اللہ کی خاص رحمت ہے، الحمدللہ۔ ایک اور صارف نے تبصرہ کیا اللہ کے تمام فیصلے رحمت سے بھرپور ہوتے ہیں، آپ کے والد ہمیشہ صحت مند اور خوش رہیں۔
واضح رہے کہ حارث وحید پاکستان کے معروف ٹی وی اداکار ہیں جو ڈراموں دو بول اور سمی سے خاصی شہرت حاصل کر چکے ہیں۔ حالیہ برسوں میں انہوں نے جانِ جہاں میں تبریز شاہ کے کردار سے خوب داد سمیٹی جبکہ بعد ازاں گرہیں میں بھی نظر آئے۔