ملک کے معروف میزبان وسیم بادامی کی ایک نجی پروگرام سے پرانی ویڈیو کلپ سوشل میڈیا پر وائرل ہو رہی ہے جس میں وہ ڈھکے چھپے الفاظ میں آل راؤنڈر شعیب ملک کے تعلقات اور شادی سے متعلق بات کرتے نظر آئے۔
یہ ویڈیو تب سامنے آئی جب شعیب اور ثنا ایک دوسرے کے ساتھ شادی کے بندھن میں بندھ چکے تھے۔
وسیم بادامی نے کچھ عرصہ قبل نجی ٹی وی شو میں شائستہ لودھی کے ہمراہ بطور مہمان شرکت کی تھی جس میں وہ بھارتی ٹینس اسٹار ثانیہ مرزا کو مخاطب کرتے ہوئے کہتے ہیں کہ 'آپ چیک کریں کہ شعیب ملک گیم شو جیتو پاکستان میں وہی کرنے آئے تھے یا کسی کا دل بھی جیت کر گئے ہیں؟
بادامی کی اس بات پر شائستہ لودھی فوراً ثانیہ مرزا سے مخاطب ہوتے ہوئے کیمرے کی طرف دیکھ کرکہتی ہیں کہ 'وہ وسیم بادامی اور شو کے میزبان احسن خان کی باتوں میں نہ آئیں، ان کا خود کا ریکارڈ خراب ہے، اس لیے وہ ایسا بول رہے ہیں۔
شائستہ کی بات سن کر وسیم بادامی کہتے ہیں 'بھئی آپ چیک کر لیں، ہمارے پاس اطلاعات تھیں ہم نے بتا دیں'۔
اس ویڈیو کو شیئر کرتے ہوئے صارفین کی جانب سے کہا جا رہا ہے کہ کئی عرصہ قبل ہی وسیم بادامی نے دونوں کے تعلقات کی دبے الفاظ میں پیشگوئی کردی تھی۔