کہتے ہیں کہ اگر کچھ کر دکھانے کی لگن ہو تو اور حوصلہ بلند ہو تو کوئی بھی رکاوٹ آپ کا کچھ نہیں بگاڑ سکتی۔ اس کی دلچسپ مثال سامنے آئی ہے۔
انڈیا میں تین فٹ کے نوجوان نے چھوٹا قد ہونے کے باجود ہار نہ مانتے ہوئے اور تکلیفوں کا سامنا کرتے ہوئے ڈاکٹر بننے کا خواب پورا کرلیا۔
ہندوستان ٹائمز کے مطابق بھارتی ریاست گجرات میں 23 سالہ گنیش برایا غیر معمولی پستہ قد ہونے کے باوجود ڈاکٹری کی شعبے میں قدم رکھنے میں کامیاب ہوا۔ ان کے ڈاکٹر بننے میں پیدا ہونے والی رکاوٹ کی داستان بھی الگ ہے۔
تین فٹ کے گنیش برایا کو ابتدائی طور پر میڈیکل کونسل آف انڈیا نے ایم بی بی ایس میں داخلے کے لیے نااہل قرار دے دیا تھا اور کہا تھا کہ چھوٹے قد کے باعث وہ ایمرجنسی کیسز کنٹرول نہیں کر سکتے۔
گنیش نے ہمت نہیں ہاری اور اپنے خواب کو پورا کرنے کے لیے اُس نے اپنے اسکول کے پرنسپل کے ساتھ مل کر ضلع کلکٹر اور ریاستی وزیر تعلیم سے مدد مانگی۔
گنیش برایا نے میڈیکل کونسل آف انڈیا کیخلاف گجرات ہائی کورٹ سے رجوع کیا جہاں وہ مقدمہ ہار گئے لیکن پھر بھی انکے عزم میں کمی نہیں آئی۔
انہوں نے فیصلے کیخلاف سپریم کورٹ میں اپیل دائر کی جہاں سے برایا نے 2018 میں مقدمہ جیت لیا اور آخر کار 2019 میں ایم بی بی ایس میں داخلہ لینے میں کامیاب ہوگئے۔
گنیش برایا ایم بی بی ایس کے بعد بھاو نگر کے اسپتال میں انٹرن شپ بھی کرچکے ہیں۔ انہوں نے بتایا کہ مریض مجھے دیکھ کر چونک جاتے ہیں لیکن پھر وہ مجھے اپنے معالج کے طور پر قبول کرلیتے ہیں۔