پاکستانی اداکارہ و میزبان مشی خان نے گلوکار ابرار الحق کے حالیہ بیان پر ان کو مضحکہ خیز قرار دے دیا۔
چند دن قبل ابرار الحق نے ایک پوڈ کاسٹ میں دعویٰ کیا تھا کہ انہیں بالی ووڈ کی مقبول اداکارہ کترینہ کیف کے ساتھ فلم کی پیشکش کی ہوئی تھی، اور یہ پیشکش معروف بھارتی پروڈکشن کمپنی ایروس کی جانب سے کی گئی تھی۔
گلوکار نے گفتگو کے دوران انکشاف کیا تھا کہ انہوں نے فلم کی پیشکش ٹھکرادی تھی کیونکہ انہیں کانٹریکٹ میں موجود شرائط اچھی نہیں لگی تھیں۔
ابرار الحق نے یہ بھی کہا کہ فلم کے معاوضے تک معاملہ پہنچ ہی نہیں سکا کیونکہ میں نے پہلے ہی انکار کر دیا تھا اور انکار سن کر کمپنی کافی حیران ہوئی اور انہوں نے کہا کہ ہمیں آج تک کسی نے منع نہیں کیا۔
ابرار الحق کے اس بیان پر اب مشی خان کا ردعمل سامنے آیا جس میں انہوں نے گلوکار کے انکشاف پر قہقہے لگائے۔
مشی خان نے انسٹاگرام پر ایک ویڈیو شیئر کی جس میں انہوں نے کہا کہ 'روز روز اتنی مزیدار اور دلچسپ خبریں سننے کو ملتی ہیں کہ سمجھ نہیں آتی انسان ہنسے، روئے یا کیا کرے، آج میں نے سنا کہ ابرار الحق کو کترینہ کے ساتھ فلم کی آفر ہوئی اور انہوں نے ٹھکرا دی۔
اداکارہ نے قہقہہ لگاتے ہوئے کہا 'یہ سال کا سب سے شاندار لطیفہ ہے، پوڈکاسٹ اور سوشل میڈیا کافی عرصہ پہلے آچکا تھا تو یہ کس سن میں آفر ہوئی تھی آپ کو ابرار الحق صاحب؟ اور آپ تب کیوں نہیں بولے؟ اتنے سال بعد کیوں یاد آیا؟
انہوں نے کہا 'آپ سمیت متعدد افراد کے پارٹی چھوڑنے کے بعد دماغ میں کچھ ہلچل سی مچی ہوئی ہے، کیا بات ہے، یہ کوئی بات ہے کرنے والی، اس عمر میں۔