ان دنوں ماہرہ خان ایمی گالہ ایوارڈز کے سلسلے میں دبئی میں موجود ہیں، اسی دوران انہیں گزشتہ روز بھارتی گلوکار ارجیت سنگھ کے کنسرٹ میں دیکھا گیا۔
جہاں سے ان دونوں کی خوبصورت ویڈیو وائرل ہورہی ہے، جس میں ارجیت سنگھ کو ماہرہ خان سے معافی مانگتے ہوئے دیکھا جاسکتا ہے۔
درحقیقت، بھارتی گلوکار اس ویڈیو میں یہ اعتراف کر رہے ہیں کہ وہ کنسرٹ میں موجود سینکڑوں شائقین کے درمیان ماہرہ خان کو پہچاننے میں ناکام رہے۔
لیکن جیسے ہی انہیں معلوم ہوا کہ شائقین کے درمیان ماہرہ موجود ہیں تو انہوں نے کنسرٹ کے دیگر شرکاء کو بھی ان سے متعارف کروایا اور ساتھ ہی شناخت میں تاخیر پر معافی بھی مانگ لی۔
ارجیت نے اچانک اپنا کنسرٹ روکا اور وہاں موجود سامعین سے مخاطب ہوکر کہا کہ، "میں کب انہیں پہچاننے کی کوشش کر رہا تھا، پھر مجھے یاد آیا کہ میں نے تو ان کے لیے گانا گایا، خواتین و حضرات ہمارے درمیان ماہرہ خان موجود ہیں، جو میرے سامنے بیٹھی ہیں۔ میں ابھی ان ہی کی فلم کا گانا ’ظالمہ‘ گا رہا تھا اور یہ میرے ساتھ کھڑی ہوکر گنگنا رہی تھیں اور میں انہیں پہچان نہ سکا جس پر میں ان سے معذرت خواہ ہوں، آپ کا بہت بہت شکریہ۔"
بعد میں ماہرہ خان نے بھی اس کنسرٹ کی مختصر ویڈیو اپنے انسٹاگرام اکاؤنٹ پر شیئر کی اور ساتھ ہی ارجیت سنگھ کی عاجزی کی خوب تعریف کی۔