اسلام آباد۔1مئی (اے پی پی):سپیکر قومی اسمبلی سردار ایاز صادق نے مزدور اور محنت کش طبقے کو زبردست خراج تحسین پیش کرتےہوئے کہا ہے کہ ہمارا مذہب اس طبقے کے حقوق کے تحفظ کی ضمانت دیتا ہے،مزدوروں اور محنت کش طبقے کے حقوق کا تحفظ اجتماعی ذمہ داری ہے،ملک کی تعمیر و ترقی محنت کش طبقے کی انتھک محنت کی مرہون منت ہے۔
قومی اسمبلی سیکرٹریٹ سے جاری بیان کے مطابق ا ن خیالات کا اظہار انہوں نے مزدوروں کے عالمی دن کے موقع پر اپنے پیغام میں کیا۔سپیکر نے کہا کہ ہمارا مذہب مزدور اور محنت کش طبقے کے حقوق کے تحفظ کی ضمانت دیتا ہے،ہمارے نبی صلی اللہ علیہ وسلم نے مزدور کا پسینہ خشک ہونے سے پہلے اس کی مزدوری ادا کرنے کا حکم دیا ، نبی کریم صلی اللہ علیہ وسلم نے فرمایا ہے کہ کسب حلال کمانے والا اور محنت کش اللہ تعالیٰ کا دوست ہوتا ہے۔انہوں نے کہا کہ مزدوروں اور محنت کش طبقے کے حقوق کا تحفظ اجتماعی ذمہ داری ہے،ملک کی تعمیر و ترقی محنت کش طبقے کی انتھک محنت کی مرہون منت ہے،آج کا دن ہمیں شکاگو کے ان مزدوروں کی قربانیوں کی یاد دلاتا ہے جہنوں نے اپنے حقوق کی خاطر اپنی جانیں قربان کیں۔ سردار ایاز صادق نے کہا کہ لیبر ڈے دنیا بھر میں محنت کش طبقے کے کردار، اپنے کام سے لگن اور عزم و استقامت کو اجاگر کرنے کی علامت کے طور پر منایا جاتا ہے۔ انہوں نے کہا کہ پاکستان کی پارلیمان ہمیشہ محنت کش طبقے کے حقوق کے تحفظ کے لیے کلیدی کردار ادا کرتی رہی ہے،سیاسی جماعتوں کو محنت کش طبقے کی فلاح و بہبود کے لیے مزید موثر قانون سازی کرنی چاہیے۔ ان کا کہنا تھا کہ پوری قوم محنت کش طبقے کی خدمات کو سلام پیش کرتی ہے، اس طبقے کی ملک کی تعمیر و ترقی کے لیے خدمات کو ہمیشہ یاد رکھا جائے گا