تحریر:مریم بھٹی
اسلام آباد۔29اپریل (اے پی پی):دنیا بھر میں ماحولیاتی تغیرات کے باعث درجہ حرارت میں بتدریج اضافہ ہو رہا ہے اور سائنسدانوں نے متنبہ کیا ہے کہ زمین کو موسمیاتی تغیرات کے باعث ہونے والی تباہی سے بچانے کے لیے فوری اقدامات لینے کی ضرورت ہے۔ تمام ممالک سمیت پاکستان کو بھی اس حوالے سے شدید چیلنجز کا سامنا ہے۔ ماحولیاتی تبدیلی کے پاکستان کے لیے اہم مضمرات ہیں، جو ملک کے ماحول، معیشت اور معاشرے کے مختلف پہلوؤں پر اثر انداز ہوتے ہیں جن میں پانی کی کمی ، انتہائی موسمی واقعات ، زرعی اثرات ، صحت کے خطرات ، سمندر کی سطح میں اضافہ، اقتصادی مضمرات شامل ہے۔ پاکستان اپنی زراعت، صنعت اور گھریلو استعمال کے لیے ہمالیہ کے گلیشیئرز کے پانی پر بہت زیادہ انحصار کرتا ہے۔ تاہم مو سمیاتی تبدیلیوں کی وجہ سےیہ گلیشیئرز تیزی سے پگھل رہے ہیں جس کی وجہ جہاں سیلاب کا خطرہ ہے ، وہیں خاص طور پر خشک موسموں میں پانی کی کمی کے مسائل پیدا ہورہے ہیں اور یہ کمی نہ صرف صوبوں کے درمیان کشیدگی کا سبب بن رہی ہے بلکہ زرعی پیداوار کو بھی متاثر کر رہی ہے۔ موسمیاتی تبدیلی شدید موسمی واقعات جیسے سیلاب، خشک سالی اور گرمی کی لہروں کی تعد اور شدت میں اضافہ کا باعث بن رہی ہے۔ ان واقعات سے املاک، انفراسٹرکچر اور زراعت پر تباہ کن اثرات مرتب ہو رہے ہیں جس سے جانوں اور معاش کا نقصان ہوتا ہے۔پاکستان کا زرعی شعبہ جو کہ معیشت میں اہم کردار کرتا ہت موسمیاتی تبدیلیوں کا شکار ہے۔ بے قاعدہ بارشوں اور انتہائی درجہ حرارت سمیت موسم کی خرابی فصلوں کی پیداوار میں کمی آئی ہے۔ مزید برآں بارش کے موسمیاتی پیٹرن میں تبدیلی مٹی کے کٹاؤ اور انحطاط کا باعث بن سکتی ہے۔ اسی طرح درجہ حرارت اور بارش کے انداز میں تبدیلی کی وجہ سے موسمیاتی تبدیلی ویکٹر سے پیدا ہونے والی بیماریوں جیسے ڈینگی بخار اور ملیریا کے ساتھ ساتھ ہیضہ کے پھیلائو میں اضافہ ہوا ہے ۔ماحولیاتی تعیرات کے پیش نظر گرمی کی لہروں میں شدت صحت کے لیےخاص طور پر بوڑھوں اور بچوں جیسی کمزور آبادیوں کے لیے خطرات پیدا کرتی ہیں۔ اگر ماحولیاتی تبدیلیوں کے باعث سمندر کی سطح میں اضافے کے حوالے سے بات کی جائے تو پاکستان کے پاس بحیرہ عرب کے ساتھ ایک طویل ساحلی پٹی ہے، اور موسمیاتی تبدیلیوں کی وجہ سے سمندر کی سطح میں اضافہ ساحلی کمیونٹیز، انفراسٹرکچر اور ماحولیاتی نظام کے لیے خطرہ ہے۔ جن میں کٹاؤ میں اضافہ، ساحلی آبی ذخائر میں نمکین پانی کا دخل، اور ساحلی زمین کا نقصان اس کے نمایاں اثرات ہیں۔ اس حوالے سے موسمیاتی تبدیلیوں اور قدرتی آفات کے بارے میں معروف ماہر نصیر میمن نے موسم کے نمونوں اور زرعی نتائج کے درمیان اہم ربط پر زور دیا۔ انہوں نے نشاندہی کی کہ اس سال تاخیر سے ہونے والی برف باری برف کی ایک پتلی تہہ کا باعث بن سکتی ہے، جو درجہ حرارت میں اضافے کے ساتھ تیزی سے پگھل سکتی ہے۔ مزید برآں، اپریل میں غیر معمولی طور پر نم موسم کا مشاہدہ کیا گیا، جس سے پنجاب میں گندم کی پکی فصلوں کو خاصا نقصان پہنچا۔ انہوں نے متنبہ کیا کہ اگر موسمیاتی تبدیلیاں مون سون کی شدید بارشوں اور اس کے نتیجے میں آنے والے سیلاب کا باعث بنتی ہیں، تو یہ فصلوں کو تباہ کر سکتی ہے، جیسا کہ 2022 میں دیکھا گیا تھا جب پاکستان میں غیر معمولی بارشوں کی وجہ سے خاص طور پر سندھ میں زراعت کے شعبے میں کافی نقصان ہوا تھا۔ مزید یہ کہ گرمیوں کے مہینوں میں سرد موسم کی مداخلت آم اور کھجور کی پیداوار کو بری طرح متاثر کر سکتی ہے۔اقتصادی اثرات پر روشنی ڈالتے ہوئے،میمن نے زراعت پر پاکستان کے بہت زیادہ انحصار کو اجاگر کیا، جو اس کی معیشت کی ریڑھ کی ہڈی کی حیثیت رکھتی ہے۔ انہوں نے کہاکہ موسمیاتی تبدیلیوں کی وجہ سے زرعی پیداوار پر کوئی منفی اثر براہ راست منڈیوں پر پڑے گا، کیونکہ شہریوں کی قوت خرید تیزی سے کم ہو جائے گی۔خاص طور پر زراعت دیہی روزگار میں 40فیصد سے زیادہ کا حصہ ہے، جس کا مطلب یہ ہے کہ اس شعبے میں کوئی بھی دھچکا دیہی بے روزگاری اور سست شہری منڈیوں میں اضافے کا باعث بنے گا۔انہوں نے پاکستان کو موسمیاتی تبدیلی کی حقیقتوں کے مطابق ڈھالنے اور سمارٹ زرعی طریقوں کو لاگو کرنے کی فوری ضرورت پر زور دیا۔ اس میں فصلوں، اقسام اور پانی کے انتظام کی حکمت عملیوں کو تیزی سے بدلتے ہوئے موسمی نمونوں کے ساتھ ہم آہنگ کرنا شامل ہے۔ انہوں نے ان چیلنجوں سے موثر انداز میں نمٹنے کے لیے تحقیق میں سرمایہ کاری میں اضافے کی ضرورت پر زور دیا۔پچھلے پانچ سالوں میں، عالمی تبدیلی نے دنیا بھر میں تباہ کن اثرات مرتب کیے ہیں، جس سے پاکستان، چین، ہندوستان، بنگلہ دیش اور دبئی جیسے ممالک متاثر ہوئے ہیں۔ تباہ کن سیلاب، شدید موسمی واقعات، اور مہلک ہیٹ ویوز تیزی سے متواتر اور شدید ہو گئے ہیں۔ پاکستان کو بار بار آنے والے سیلابوں، لاکھوں لوگوں کے بے گھر ہونے اور انفراسٹرکچر اور زراعت کو نقصان پہنچانے کا سامنا ہے۔ چین گرمی کی لہروں اور طوفانی بارشوں سے دوچار ہے جس سے بڑے پیمانے پر تباہی ہوئی ہے۔ بھارت اور بنگلہ دیش سمندری طوفانوں اور بڑھتی ہوئی سمندری سطح، ساحلی برادریوں کو بے گھر کرنے اور غربت میں اضافے کا شکار ہیں۔ یہاں تک کہ دبئی کو بھی بے مثال سیلاب کا سامنا کرنا پڑا ، جس سے آب و ہوا کے خطرات میں تیزی سے پھیلتے شہری علاقوں کے خطرے کو ظاہر ہوتا ہے۔ یہ بحران عالمی اقدام کی فوری ضرورت پر زور دیتے ہیں۔ اقوام متحدہ کو موسمیاتی تبدیلیوں اور تحفظ کو کم کرنے کے لیے فیصلہ کن اقدامات کو ترجیح دینی چاہیے۔ان چیلنجوں سے نمٹنے کے لیے پاکستان کو آب و ہوا کے موافقت اور تخفیف کے لیے جامع حکمت عملیوں کی ضرورت ہے، جس میں پانی کے انتظام، زراعت، آفات سے نمٹنے کی تیاری اور قابل تجدید توانائی میں سرمایہ کاری شامل ہے۔ جہاں موسمیاتی تبدیلیوں کے اثرات سے مؤثر طریقے سے نمٹنے کے لیے پاکستان کے لیے بین الاقوامی تعاون اور حمایت بھی بہت ضروری ہے وہیں بلاشبہ پاکستان موسمیاتی تبدیلیوں کے بارے میں عام لوگوں میں شعور بیدار کرنے کی اشد ضرورت ہے ، اس حوالے سے ملک میں ایسی تعلیمی مہمات کا آغاز کیا جا سکے جس میں مختلف ذرائع جیسے ٹیلی ویژن، ریڈیو، سوشل میڈیا، اور کمیونٹی ایونٹس کے لوگوں کو ماحولیاتی تبدیلیوں کے اسباب اور اثرات سے آگاہ کیا جا سکے۔اسکول کے نصاب کا انضمام: ابتدائی عمر سے ہی قومی نصاب میں موسمیاتی تبدیلی کی تعلیم کو شامل کرنے سے نوجوان نسل میں بیداری پیدا کرنے میں مدد مل سکتی ہے، جو مستقبل کے فیصلہ ساز ہیں۔کمیونٹی ورکشاپس اور سیمینارز کے ذریعے ماحولیاتی تبدیلیوں کے مسائل، پاکستان پر اس کے اثرات، اور اس کو کم کرنے کے لیے افراد کیا کر سکتے ہیں، پر لوگوں کو متحرک کیا جاسکتا ہے ۔ سرکاری اور غیر سرکاری تنظیموں (این جی اوز)، سول سوسائٹی گروپس، اور ماحولیاتی کارکنوں کے ساتھ شراکت داری کے تحت اس حوالے سے لوگوں کو آگاہ کیا جاسکتا ہے۔ پائیدار طریقوں کی حوصلہ افزائی ، توانائی کا تحفظ، فضلہ کم کرنا، درخت لگانا، اور پانی کے تحفظ کو آگاہی مہمات اور ترغیبات کے ذریعے بھی لوگوں میں ماحولیاتی تبدیلیو ں کی آگاہی دی جاسکتی ہے۔ سی طرح پاکستان میں، جہاں مذہب لوگوں کی زندگیوں میں ایک اہم کردار ادا کرتا ہےوہیں مذہبی رہنماؤں کو ماحول کے تحفظ کی اہمیت کے بارے میں آگاہی پھیلانے کے لیے شامل کرنا انتہائی مؤثر ثابت ہو سکتا ہے۔ٹیکنالوجی کا استعمال کرکے معلومات کو پھیلانے اور موسمیاتی تبدیلی کے بارے میں بات چیت میں عوام کو شامل کرنے کے لیے ٹیکنالوجی جیسے موبائل ایپس، انٹرایکٹو ویب سائٹس، اور آن لائن فورمز معاون ثابت ہو سکتے ہیں ۔ اس حوالے سے مقامی زبانوں میں معلومات فراہم کرنا بہت ضروری ہے تاکہ ہر کوئی بشمول دیہی علاقوں میں اس حوالے سے پیغام کو سمجھ سکے اور مناسب کارروائی کر سکے۔پائیدار طریقوں کو نافذ کرنے والے افراد یا کمیونٹیز کے کیس اسٹڈیز اور کامیابی کی کہانیوں کا اشتراک بھی لوگوں میں پیروی کرنے کی ترغیب دے سکتا ہے۔ پالیسی سازوں کی حوصلہ افزائی کرنا بہت ضروری ہے تاکہ وہ موسمیاتی تبدیلی کی تعلیم کو ترجیح دیں اور آگاہی مہموں اور اقدامات کے لیے وسائل مختص کریں۔ان حکمت عملیوں پر عمل درآمد کرکے، پاکستان موسمیاتی تبدیلیوں کے بارے میں آگاہی کو مؤثر طریقے سے بڑھا سکتا ہے اور اپنے شہریوں کو اس کے اثرات کو کم کرنے کے لیے اقدامات کرنے کے لیے بااختیار بنا یا جا سکتا ہے۔