مہرِ عرب ماہِ عجم

دور کردیں دل کی ظلمت مہرِ عرب ماہِ عجم
اور بھردیں اپنی الفت مہرِ عرب ماہِ عجم

مجھ کو طیبہ میں بلالیں ، روئے انور بھی دکھادیں
اور جگہ دیں بہر تربت مہرِ عرب ماہِ عجم

عادتِ بدمیں پھنسا ہوں ، اور گناہوں میں لگا ہوں
کردیں مجھ کو نیک سیرت مہرِ عرب ماہِ عجم

منتشر یہ ذھن و دل ہیں ، جسم و جاں بھی مضمحل ہیں
فکرِ دنیا کردیں رخصت مہرِ عرب ماہِ عجم

رنج و غم دنیا کے آقا ، کررہے ہیں دل پہ قبضہ
دور کردیں درد و کلفت مہرِ عرب ماہِ عجم

میرے ماں اور باپ سے بھی ، دور کردیں موج غم کی
بخش دیں اُن کو مسرّت مہرِ عرب ماہِ عجم

میرے دل میں جانِ رحمت ، نہ بسے دنیا کی الفت
بخش دیں اپنی محبت مہرِ عرب ماہِ عجم

اپنے ہی اے جانِ جاناں، کر رہے ہیں اب ہراساں
حاسدوں پہ دیدیں نصرت مہرِ عرب ماہِ عجم

یہ مُشاہدؔ ہے ثنا خواں ، آپ کا اے شاہِ شاہاں
کردیں اس پہ خاص رحمت مہرِ عرب ماہِ عجم