قلب کو اس کی رویت کی ہے آرزو

اَللّٰہُ اَللّٰہُ اَللّٰہُ اَللّٰہُ

قلب کو اس کی رویت کی ہے آرزو
جس کا جلوہ ہے عالم میں ہر چار سو
بلکہ خود نفس میں ہے وہ سبحانہ
عرش پر ہے مگر عرش کو جستجو

اَللّٰہُ اَللّٰہُ اَللّٰہُ اَللّٰہُ

عرش و فرش و زمان و جہت اے خدا
جس طرف دیکھتا ہوں ہے جلوہ ترا
ذرے ذرے کی آنکھوں میں توہی ضیا
قطرے قطرے کی تو ہی تو ہے آبرو

اَللّٰہُ اَللّٰہُ اَللّٰہُ اَللّٰہُ

سارے عالم کو ہے تیری ہی جستجو
جن و انس و ملک کو تری آرزو
یاد میں تیری ہر اک ہے سو بسو
بن میں وحشی لگاتے ہیں ضربات ہو

اَللّٰہُ اَللّٰہُ اَللّٰہُ اَللّٰہُ

طائران جناں میں تری گفتگو
گیت تیری ہی گاتے ہیں وہ خوش گلو
کوئی کہتا ہے حق، کوئی کہتا ہے ہُو
اور سب کہتے ہیں لا شریک لہ

اَللّٰہُ اَللّٰہُ اَللّٰہُ اَللّٰہُ

خواب نوری میں آئیں جو نورِ خدا
بقعہ نور ہو اپنا ظلمت کدا
جگمگا اٹھے دل، چہرہ ہو پُر ضیا ئ
نوریوں کی طرح شغل ہو ذکر ہو

اَللّٰہُ اَللّٰہُ اَللّٰہُ اَللّٰہُ