تشنہ دیدار رسول عربی

میں کہ ہوں تشنہ دیدار رسول عربی
مجھ کو بھی ساغر سرشار، رسول عربی

عرش اور فرش کے اسرار عیاں ہیں تجھ پر
تو کہ ہے محرم اسرار، رسول عربی

کوئی لائے گا نہ پیغام خدا تیرے بعد
دل سے میں کرتا ہوں اقرار٬ رسول عربی

حشر میں تیری شفاعت ہی تو کام آئے گی
میں تو ہوں سخت گناہگار٬ رسول عربی

دونوں عالم میں تیرے مرتبہ عالی کا
کون کر سکتا ہے انکار٬ رسول عربی

تیرے روضے کی زیارت کے سوا رفعت کو
اور کچھ بھی نہیں درکار٬ رسول عربی