Ajab Pagal Sa Larka Hai

Ajab Pagal Sa Larka Hai
Wo Mujh Se Jab Bhi Milta Hai
Mujhay Her Baar Kehta Hai
Teray Honay Se Meri Zaat Ki Takmeel Hoti Hai
Usay Maloom Bhi Hai Main To Khud Ik Aam Larki Hoon
Magar Wo Mujh Se Kehta Hai
Nahi Tum Sa Koi Dooja
Ajab Pagal Sa Larka Hai
Wo Mujh Se Jab Bhi Milta Hai
Naya Ik Naam Deta Hai, Naii Pehchaan Deta Hai
Meray Andar Ke Sab Mosam Bina Meray Kahey Hi Wo Hamesha
Jaan Laita Hai
Meri Barson Purani Baat Bhi Wo Yaad Rakhta Hai
Mujhay Her Baar Kehta Hai
Teri Aawaz Ka Jadoo Mujhay Sonay Nahi Deta
Ajab Pagal Sa Larka Hai
Wo Mujh Se Jab Bhi Milta Hai
To Pehron Mujh Ko Takta Hai
Usay Her Rang Jo Main Ne Ho Pehna, Acha Lagta Hai
Usay Her Khuab Jo Main Ne Ho Dekha, Sacha Lagta Hai
Ajab Pagal Sa Larka Hai
Wo Mujh Se Jab Bhi Milta Hai
Mujhay Her Baar Kehta Hai
Teri Muskan Janan Zindagi Main Rang Bharti Hai
Mujhay Dukh Ke Andheron Main Kabhi Khonay Nahi Deti
Usay Meray Hina-Ii Haath Takna Acha Lagta Hai
Usay Mujh Ko Mujhi Ko Sochnay Ki Janay Kia Zid Hai
Ho Din Ka Koi Bhi Lamha, Andheri Raat Ka Pal Ho
Wo Mujh Ko Socha Karta Hai, Mujhi Ko Yaad Rakhta Hai
Ajab Pagal Sa Larka Hai
Wo Mujh Se Jab Bhi Milta Hai
Hazaron Baar Kehta Hai
Mujhay Tum Se Mohabbat Hi Nahi Hai Ishq Hai Janan
Bus Ik Pal Main Wo Apna Aap Mujh Ko Sonp Deta Hai
Main Us Pagal Se Larkay Ke Liye Ab Aur Kia Likhoon
Mujhay Us Ko Batana Hai
Ke Us Ki Muskurahat Per
Main Duniya Waar Sakti Hoon