گل عشق نہ توں پاویں

عشق تکڑی وچہ پا کے کسے نئیں جے تولیا
مکھن پانیوں وی یارو کسے نئیں جے رولیا
جہڑا رمز نہ سمجھے سیانے اوہنوں کیہ کہن گے
گل عشق نہ توں پاویں دکھ سہنے پین گے
خانے عقلاں دے تیرے سارے گہنے پین گے

شبلی ماریا سی پہل منصور یار نوں
ذرا ترس نہ آیا میرے یار غار نوں
پہل ماریا توں مینوں طعنے سہنے پین گے
گل عشق نہ توں پاویں دکھ سہنے پین گے
خانے عقلاں دے تیرے سارے گہنے پین گے

یاری شبلی دی دساں تینوں کس تل دی
منصور کرلاوے درد سخت پہل دی
درد چہلیا نئیں جاندا روڑے سہنے پین گے
گل عشق نہ توں پاویں دکھ سہنے پین گے
خانے عقلاں دے تیرے سارے گہنے پین گے

سانوں ماریا بےصبری دل نہیں رجدے
کدے وسدے نئیں یارو جہڑے نت گجدے
شعر رمزاں۔۔۔۔۔والے سانوں کہنے پین گے
گل عشق نہ توں پاویں دکھ سہنے پین گے
خانے عقلاں دے تیرے سارے گہنے پین گے

گل عشق والی یارو کدے نئیں جے مکدی
رہندی مت نئیں ٹھکانے گڈی نئیں جے رکدی
پہاویں پچھ پورا ناواں سارے ٹھیک کہن گے
گل عشق نہ توں پاویں دکھ سہنے پین گے
خانے عقلاں دے تیرے سارے گہنے پین گے

ناگ عشق والا زہری جہنوں ڈنگ جاوندا
رہندا ہوش نہ ٹھکانے راہوں بھل جاوندا
راہ عشق والا ڈونگا اوکھے ساں لینے پین گے
گل عشق نہ توں پاویں دکھ سہنے پین گے
خانے عقلاں دے تیرے سارے گہنے پین گے

موت یاد نئیں کوئی تینوں کیوں پھریں بھلیا
چھڈ دے دنیا دا لالچ اجے کجھ نئیں جے ڈھلیا
جدوں جاویں گا توں اوتھے حساب دینے پین گے
گل عشق نہ توں پاویں دکھ سہنے پین گے
خانے عقلاں دے تیرے سارے گہنے پین گے

غلام حضور شاہ کرلاوے جند کیویں بچ دی
یاری رب نال لا کے ایہو پریت حق سچ دی
سارے کرن گے تعریفاں نالے نیک کہن گے
گل عشق نہ توں پاویں دکھ سہنے پین گے
خانے عقلاں دے تیرے سارے گہنے پین گے