سلام بحضور سید اشہدا

عزماں دی چٹان حسین اے
میری تے جند جان حسین اے

جبر نوں کرچیاں وچ جو ونڈے
صبر دی اوہ چٹان حسین اے

حق دا جھنڈا اچا رکھیا
دین نبی دی شان حسین اے

سارا گھر قربان چا کیتا
دین دا نگہبان حسین اے

دکھیو آؤ ایس دوارے
دکھاں دا درمان حسین اے

فاتح خیبر دا نور نظر اے
جرات دی پہچان حسین اے

استبداد نوں جڑ توں پٹیا
عادل تے ذی شان حسین اے

اسریٰ دے پاندھی دا نواسا
حق دی جان سنجان حسین اے

میرے وچوں ایہ سوہنا اے
مرسل دا فرمان حسین اے

حق دی راہ تے مرن والے لئی
جنت دا اعلان حسین اے

منگن والیو رل کے منگیے
بہوں وڈا دھنوان حسین اے

تیغ تلے تے نیزے اتے
پڑھدا رہیا قرآن حسین اے

لا الہ دی رمز سکھائی
تیرا بہوں احسان حسین اے

جنت دے واسی ناز کریندے
ہر اک دا ارمان حسین اے

اصغر ،اکبر، قاسم دے کے
رب توں پائی شان حسین اے

صحرا وچ ہے شام غریباں
سیدانیاں دا نگہبان حسین اے

راج محل وچ ہن تیک شمر اے
صعوبتاں وچ کاروان حسین اے

تیرے غم وچ ہنجو کیراں
میر ایہو سامان حسین اے

کلمہ لوکی پڑھدے پئے ہن
سب کجھ تیرا دان حسین اے