بلوچستان کے ضلع مستونگ میں گزشتہ روز پیش آنے والا ایک معمولی جھگڑا خوفناک خونی تصادم میں بدل گیا، جس کے نتیجے میں دو نوجوان جان کی بازی ہار گئے جبکہ ان کا ضعیف والد شدید زخمی حالت میں اسپتال میں زیرِ علاج ہے۔
عینی شاہدین کے مطابق بس اڈہ مستونگ پر محض 50 روپے کے معمولی تنازعے نے اُس وقت سنگین صورت اختیار کرلی جب کباب فروش ایک بزرگ شخص اور اس کے دو بیٹوں پر مبینہ طور پر 20 سے زائد افراد نے لاٹھیوں اور لوہے کے راڈوں سے بے رحمانہ تشدد کیا۔ سفاکانہ حملے میں تینوں شدید زخمی ہوگئے۔
زخمیوں کو فوری طور پر ڈسٹرکٹ اسپتال منتقل کیا گیا، جہاں دونوں نوجوان دم توڑ گئے، پولیس نے جائے وقوعہ کا معائنہ کر کے شواہد اکھٹے کرلیے ہیں اور مختلف پہلوؤں سے واقعے کی تحقیقات جاری ہیں۔