کراچی میں ای چالان کے نفاذ کو 30 دن مکمل ہوگئے ہیں جس کے دوران ٹریفک قوانین کی خلاف ورزی کرنے والے 93 ہزار سے زائد افراد کے خلاف چالان کیے جا چکے ہیں۔
ٹریفک پولیس کی رپورٹ کے مطابق سب سے زیادہ 57 ہزار 541 چالان سیٹ بیلٹ نہ باندھنے پر کیے گئے جبکہ 22 ہزار 227 موٹر سائیکل سواروں کے ہیلمٹ نہ پہننے پر جرمانے عائد کیے گئے۔
تیز رفتاری پر ڈمپر، ٹریلر اور واٹر ٹینکر میں نصب ٹریکر کی مدد سے 1 ہزار 188 چالان کیے گئے جبکہ دیگر گاڑیوں کی تیز رفتاری پر 2 ہزار 699 چالان ہوئے۔ ٹریفک سگنل کی خلاف ورزی پر 3 ہزار 102 چالان جاری کیے گئے۔
اس کے علاوہ فینسی نمبر پلیٹ والی 1 ہزار 278، رنگین شیشے والی 1 ہزار 178 گاڑیوں کے چالان کیے گئے، اسٹاپ لائن کی خلاف ورزی پر 611 اور رانگ وے گاڑی چلانے پر 426 چالان کیے گئے۔
ٹریفک پولیس کے مطابق سیٹ بیلٹ نہ باندھنے والے افراد سے مجموعی طور پر 57 کروڑ 54 لاکھ 10 ہزار روپے، ہیلمٹ نہ پہننے پر بائیک سواروں سے 11 کروڑ 11 لاکھ 35 ہزار روپے اور رنگین شیشے والی گاڑیوں سے 2 کروڑ 94 لاکھ 50 ہزار روپے جرمانہ وصول کیا گیا۔
ٹریفک پولیس حکام کا کہنا ہے کہ ای-چالان کے نفاذ سے شہریوں میں ٹریفک قوانین کی پاسداری کے بارے میں شعور پیدا ہوا ہے اور یہ اقدامات سڑکوں پر حفاظت اور نظم و ضبط بڑھانے میں مددگار ثابت ہو رہے ہیں۔