دبئی ائیر شو کے دوران بھارتی جنگی طیارے تیجس کے حادثے کے بعد آرمینیا نے بھارت سے طیاروں کی خریداری کے مذاکرات معطل کر دیے ہیں۔ یہ ڈیل 1.2 ارب ڈالر مالیت کی تھی اور اس کے تحت 12 طیارے خریدے جانے تھے۔ اگر یہ معاہدہ طے پاتا تو یہ تیجس طیارے کی پہلی بڑی بین الاقوامی برآمدی ڈیل ہوتی۔
غیر ملکی میڈیا کے مطابق آرمینیا کی جانب سے خریداری معطل کرنے کا فیصلہ طیارے کی قابلِ بھروسہ کارکردگی اور آپریشنل استحکام پر سوالات کے بعد کیا گیا۔ دبئی ایئر شو میں 21 نومبر کو بھارتی وِنگ کمانڈر نمانش سیال کی قیادت میں ائیر شو کے دوران طیارہ گر کر تباہ ہوا اور پائلٹ موقع پر ہی ہلاک ہوگئے۔
ماہرین کے مطابق اس پیش رفت سے نہ صرف بھارت کے دفاعی برآمدات کے منصوبے متاثر ہوں گے بلکہ تیجس پروگرام کے بین الاقوامی تشخص، تکنیکی قابلیت اور مستقبل کی فروخت پر بھی براہِ راست اثر پڑے گا۔ بھارت مارکیٹ میں جنوبی کوریا کے FA-50، فرانس کے رافیل اور پاک چین کے JF-17 طیاروں کے سخت مقابلے کا سامنا کر رہا ہے، اور اس حادثے نے تیجس کے لیے بین الاقوامی اعتماد کو کمزور کر دیا ہے۔
آرمینیا اب متبادل آپشنز پر غور کر رہا ہے، جن میں FA-50 اور فرانسیسی رافیل شامل ہیں۔ بھارت اس واقعے کی عدالتی تحقیقات کر رہا ہے اور عالمی سطح پر تیجس پروگرام کی ساکھ پر پڑنے والے منفی اثرات کو کم کرنے کے لیے سفارتی رابطے بھی جاری ہیں۔
یہ معاملہ بھارتی دفاعی برآمدات کے لیے بڑا دھچکا سمجھا جا رہا ہےکیونکہ اگر یہ ڈیل مکمل ہوتی تو یہ بھارت کی دفاعی برآمدات کا سب سے بڑا معاہدہ ہوتا۔