اسلام آباد۔16مئی (اے پی پی):قومی ایئرلائن (پی آئی اے) نے قبل از حج آپریشن کے تحت گزشتہ 7 روز کے دوران کل 20 پروازوں کے ذریعے 4,398 عازمین حج کو حجاز مقدس پہنچایا ۔ پی آئی اے کے ترجمان عبداللہ حفیظ خان کی طرف سے جمعرات کو جاری بیان کے مطابق ان پروازوں میں 14 پروازیں براہ راست مدینہ منورہ کے لئے روانہ ہوئیں جبکہ 6 پروازیں براستہ کراچی اپنی منزل مقصود پر اتری ہیں۔
ترجمان نے کہا کہ پی آئی اے کی حج پروازیں 23 مئی تک مدینہ منورہ کے لئے آپریٹ ہو رہی ہیں۔ ترجمان نے کہا کہ 24 مئی سے 10 جون تک جدہ کے لئے حج پروازیں چلائی جائیں گی۔ ترجمان نے کہا کہ پی آئی اے کا قبل از حج آپریشن 190 پروازوں پر مشتمل ہوگا جن میں 170 پروازیں براہ راست اور 20 پروازیں براستہ کراچی آپریٹ ہوں گی۔ براستہ کراچی پروازوں میں 15 پروازیں کوئٹہ سے اور 5 پروازیں سکھر سے چلائی جائیں گی ۔