اسلام آباد۔12مئی (اے پی پی):سپیکر قومی اسمبلی سردار ایاز صادق نے مائوں کے عالمی دن کے موقع پر دنیا بھر کی مائوں کو خراج تحسین پیش کرتے ہوئے کہا ہے کہ قوم ان تمام مائوں کی مقروض ہے جن کے بیٹے وطن عزیز کے وقار اور خودمختاری کے تحفظ کیلئے شہید ہوئے، ماں کی محبت وہ ناقابل شکست توانائی ہے جو عام انسانوں کو اپنی زندگی میں ناممکن کارنامے انجام دینے کے قابل بناتی ہے
،مائیں اپنی بے لوث قربانیوں، غیر مشروط محبت اور غیر متزلزل لگن کے ذریعے آنے والی نسلوں کی تشکیل میں کلیدی کردار ادا کرتی ہیں۔قومی اسمبلی سیکرٹریٹ ڈائریکٹوریٹ جنرل آف میڈیا کی طرف سے جاری بیان کے مطابق ان خیالات کا اظہار انہوں نے مائوں کے عالمی دن کے حوالے سے اپنے پیغام میں کیا،جو ہر سال 12 مئی کو ماں کے ساتھ اظہار تشکر اور احترام کے طور پر منایا جاتا ہے۔ خاندانی ذمہ داریوں اور پیشہ ورانہ کوششوں میں توازن پیدا کرنے میں ماں کو درپیش بے پناہ چیلنجوں کو تسلیم کرتے ہوئے ایاز صادق نے ماں کے عزم اور حوصلے کو سراہا۔انہوں نے کہا کہ ہر قوم اپنی مائوں کی شکر گزار ہے جو بے پناہ محبت اور شفقت کے ساتھ پرورش اور رہنمائی کرتی ہیں۔انہوں نے زچہ و بچہ کے حقوق کے تحفظ کے عزم کا اعادہ کیا، انہوں نے قانون سازی کے ذریعے کئے گئے اقدامات کا ذکر کرتے ہوئے کہا کہ پارلیمنٹ میں خواتین اور بچوں کی فلاح و بہبود کیسلسلے میں اہم اقدامات کئے گئے ہیں جن میں پارلیمانی فورمز جیسے خواتین کی پارلیمانی کاکس، ایس ڈی جیز سیکرٹریٹ اور پارلیمانی کاکس آن چائلڈ رائٹس شامل ہیں۔سپیکر نے فلسطین اور مقبوضہ جموں و کشمیر کی مائوں کو بھی زبردست الفاظ میں خراج تحسین پیش کیا جن کے بچے تو شہید ہو رہے ہیں لیکن ان کا عزم، حوصلہ ابھی بھی بلند ہے اور وہ اپنے حق خود ارادیت کیلئے مسلسل جدو جہد اور غیر متزلزل جذبے کے ساتھ سیسہ پلائی ہوئی دیوار کی مانند کھڑی ہیں۔انہوں نے کہا کہ فلسطین اور کشمیر میں نہتے شہریوں اور معصوم بچوں کو دہشتگردی کے ذریعے قتل کرنا انسانی حقوق کی سنگین خلاف ورزیوں کے زمرے میں آتا ہے۔سپیکر قومی اسمبلی نے کہا کہ فلسطین میں مائوں کی آنکھوں کے سامنے ہزاروں بچوں کا قتل عام دنیا کے جدید اصولوں اور عالمی انسانی حقوق کے منافی ہے۔انہوں نے کہا کہ آج وہ جو کچھ بھی ہیں اپنے والدین کی دعائوں اور تربیت کی وجہ سے ہیں۔انہوں نے نوجوان بچوں اور بچیوں کی حوصلہ افزائی کرتے ہوئے ان پر زور دیا کہ وہ اپنی مائوں کی عزت کریں کیونکہ دنیا اور آخرت کی کامیابیاں اور کامرانیاں اس عظیم رشتے کی مرہون منت ہیں۔انہوں نے ماں کے رشتے کی منفرد اور بے لوث نوعیت کو اجاگر کرتے ہوئے کہا کہ ماں کا رشتہ غیر مشروط محبت، قربانی اور مشکل وقت میں راحت و سکون فراہم کرنے کا ذریعہ ہے۔