اسلام آباد۔11مئی (اے پی پی):نائب وزیراعظم اور وزیر خارجہ سینیٹر محمد اسحاق ڈار 13 سے 16 مئی 2024 تک عوامی جمہوریہ چین کے دار الحکومت بیجنگ کا چار روزہ دورہ کریں گے جہاں وہ چینی وزیر خارجہ اور چین کی کمیونسٹ پارٹی کے امور خارجہ کمیشن، جنرل آفس کے ڈائریکٹر وانگ یی کے ساتھ پانچویں پاک چین وزرائے خارجہ اسٹریٹجک ڈائیلاگ کی مشترکہ صدارت کریں گے۔
دفتر خارجہ کی جانب سے ہفتہ کو جاری اعلامیہ کے مطابق اس موقع پر فریقین اقتصادی اور تجارتی تعاون، اعلیٰ سطح کے تبادلے اور دورے،چین پاکستان اقتصادی راہداری کی اپ گریڈیشن اور مستقبل کے رابطے کے اقدامات سمیت پاک چین دوطرفہ تعلقات کا جامع جائزہ لیں گے۔ دونوں رہنما علاقائی جغرافیائی سیاسی منظر نامے اور کثیرالجہتی فورم پر دوطرفہ تعاون پر بھی تبادلہ خیال کریں گے۔سٹریٹیجک ڈائیلاگ کے موقع پر نائب وزیر اعظم اور وزیر خارجہ محمد اسحاق ڈار کی چینی رہنماؤں، سینئر وزراء اور کارپوریٹ شعبہ کے سرکردہ ایگزیکٹوز سے ملاقات بھی متوقع ہے۔نائب وزیراعظم کا دورہ پاکستان اور چین کے درمیان اعلیٰ سطح کے باقاعدہ تبادلوں کا حصہ ہے۔ یہ دورہ “آل ویدر اسٹریٹجک کوآپریٹو پارٹنرشپ” کو مزید گہرا کرنے ، بنیادی دلچسپی کے امور پر باہمی تعاون کی توثیق، سی پیک سمیت اقتصادی اور تجارتی تعاون کے فروغ، علاقائی امن اور ترقی کے لیے مشترکہ عزم کو تقویت دینے کے حوالہ سے دونوں ممالک کے عزم اور اس کی اہمیت کی عکاسی کرتا ہے۔