"ایک بار جب میں نے نئی نئی گاڑی خریدی تھی تو پیچھے سے ایک گاڑی والے نے میری گاڑی کو ٹکر مار دی. غصے میں میں نے اسے کہا کہ اندھے ہو کیا لیکن جب اس نے میری طرف دیکھا تو اندازہ ہوا کہ واقعی وہ ٹھیک سے نہیں دیکھ سکتا تھا لیکن اس کے باوجود محنت کر کے پیسے کما رہا تھا. میں اس شخص سے معافی مانگنا چاہتا ہوں"
یہ کہنا ہے معروف گلوکار ابرار الحق کا جنھوں نے ایک نجی چینل کے شو میں ماضی اور دل میں رہ جانے والی خلش کے متعلق گفتگو کی.
ابرار الحق کا کہنا تھا کہ کاش میں اپنے والدین کی تھوڑی اور خدمت کرلیتا. خواہش تھی کہ میں ماں باپ کے ساتھ اپنی کامیابیاں بانٹ سکتا جو میں نہیں کر سکا۔
ابرار نے اپنی گفتگو جاری رکھتے ہوئے مزید بتایا کہ وہ ایک شخص سے معافی مانگنا چاہتے ہیں. جب ان کے والد زندہ تھے تو بہت سے لوگ مدد مانگنے کے لئے ان کے پاس آیا کرتے تھے. ایک بار ایک آدمی کو اپنی چھت بنوانے کے لیے کافی زیادہ پیسے چاہئے تھے لیکن میں نے صرف آدھی رقم یہ سوچ کر اسے دی کہ شاید وہ جھوٹ بول رہا ہے. اس کے بجائے کسی حقیقی حقدار کو دوں گا. بعد میں مجھے احساس ہوا اگر اللہ تعالیٰ نے بھی ایسا کرنا شروع کردیا تو میری باری تو آٗے گی ہی نہیں کیونکہ مجھ سے زیادہ کئی اور حقدار پہلے سے موجود ہیں۔