کراچی (نیٹ نیوز) عید کی تعطیلات جاری رہنے کے باوجود منگل کے دن میٹرک بورڈ کراچی اور ثانوی و اعلیٰ ثانوی تعلیمی بورڈ میر پور خاص میں معمول کے مطابق کام جاری رہا۔ ان دونوں تعلیمی بورڈز میں میٹرک کے سالانہ امتحانات برائے سال 2015کے نتائج کو مرتب کرنے کا کام جاری ہے اسلئے یہاں کے افسران اور عملے نے رضا کارانہ طور پر اپنے چیئرمین پروفیسر انوار احمد زئی کو یقین دلایا تھا کہ وہ صرف عید کے دن چھٹی کریں گے جبکہ عید کی سرکاری تعطیلات کے دنوں میں دفتر کھلا رہے گا اور نتائج مرتب کرنے کا باقی رہاکام مکمل کریں گے اس طرح منگل کے دن بھی عملہ اور افسران بورڈ میں موجود رہا۔ اس موقع پر ثانوی تعلیمی بورڈ کے چیئرمین پروفیسر انوار احمد زئی نے کام کرنے والے تمام عملے سے ملاقات کی اور ان کے جذبے کو سراہا۔