ڈبل چن سے نجات پانے کے7 ٹوٹکے

وزن کم کرنے کے خواہش مند افراد اکثر کچھ خاص جگہوں پر جمع ہونے والی چربی کو لے کر زیادہ فکر مند رہتے ہیں جن میں سب سے اہم اور قابل ذکر تھوڑی کے نیچے جمع ہونے والے فیٹی ٹشوز ہیں جنھیں دہری تھوڑی یا ڈبل چن بھی کہتے ہیں ۔ بعض اوقات دوہری تھوڑی یا ڈبل چن کا مسئلہ محض زیادہ وزن ہونے کی وجہ سے نہیں بلکہ ایجنگ یعنی عمر بڑھنے کے باعث بھی ہوسکتا ہے ۔ تھوڑی کے نیچے موجود پٹھا جسے مسکیولس مائلو ہائیڈس کہتے ہیں لچک کھو دیتا ہے اور لٹکنے لگتا ہے۔ اس کے صحت پر تو کوئی منفی اثرات نہیں پڑتے لیکن یہ دیکھنے میں بدنمالگتی ہے اور اکثر افراد اس کی وجہ سے خود اعتمادی میں کمی محسوس کرتے ہیں ۔ اسے چھپانے کے لیے کئی لوگ خصوصاًخواتین مفلر یا کاسمیٹکس کا سہارا لیتی ہیں لیکن یہ اس مسئلے کا محض وقتی حل ہوتا ہے ۔ اسکے علاوہ اس سے نجا ت پانے کے لیے سرجری بھی کرائی جاتی ہے لیکن یہ ایک انتہائی تکلیف دہ اور مہنگا طریقہ ہے ۔

ان گھریلو ٹوٹکوں کے ذریعے آپ بنا پیسے خرچ کیئے گھر بیٹھے ڈبل چن یا دوہری تھوڑی سے چھٹکارا حاصل کر سکتے ہیں :

1۔ کوکوا بٹر

کوکوا بٹر میں موائسچرائزنگ خصوصیات ہوتی ہیں جس سے لٹکی ہوئی جلد ٹھیک ہو جاتی ہے اور مردہ خلیات سے بھی نجات مل جاتی ہے ۔ اس میں موجود اینٹی آکسیڈنٹ جلد پر سے بڑھتی عمر کے اثرات کو دور کرتا ہے ۔ یہ جلد کو نمی مہیا کرتا ہے اور اس میں لچک پیدا کرتا ہے ۔ 1سے 2چمچ کوکوا بٹر کو ذرا سا گرم کریں ۔پھر چہرے ، تھوڑی اور گردن پر لگالیں ۔ 15منٹ تک ہلکے ہاتھ سے مسا ج کریں۔ ہاتھوں کو گردن سے تھوڑی کی طرف لے جائیں ۔ اس عمل کو روزانہ رات کو دہرائیں ۔

2۔ سبز چائے

اس چائے کے استعمال سے بھی جلد لچک دار ہو جاتی ہے ۔ اس میں موجود اینٹی آکسیڈنٹ زائد کیلری جلانے میں مدد کرتے ہیں ۔ دن میں تین کپ سبز چائے کے پئیں ۔ اس کے علاوہسبز چائے کے بیگز سے جلد کا مساج بھی کیا جا سکتا ہے ۔

3۔ دودھ کی بالائی

دودھ کی بالائی سے جلد میں کھچاؤ پیدا ہوتا ہے ۔ چند منٹوں تک دودھ کی بالائی سے چہرے اور گردن کا مساج کرنے سے جلد ترو تازہ اور لچک دار ہوجاتی ہے ۔ اس سے جلد کو ضروری غذائیت بھی فراہم ہوتی ہے ۔ دودھ اور شہد کا ماسک بنا کر چہرے اور گردن پر لگایا جا سکتا ہے ۔اسے دس منٹ لگا رہنے دیں پھر ہلکے گرم پانی سے صاف کردیں ۔

4۔ گردن کی ورزش

حرکت نہ کرنے کی وجہ سے اکثر گردن کے پٹھے ڈھیلے پڑ جاتے ہیں ۔ جس کی وجہ سے تھوڑی کے نیچے چربی جمع ہونے لگتی ہے ۔ کم از کم دن میں دو مرتبہ گردن کو گول گھمائیں۔ اس سے ڈبل چن بہت جلدی ختم ہو جائے گی ۔ایک اور ورزش اس طرح سے ہے کہ اپنی زبان باہر نکالیں اور دس تک گنتی گنیں ۔ اس ورزش کو دن میں پانچ سے چھ بار کریں ۔

5۔ تھوڑی کو باندھنا

سب سے پہلے تھوڑی پر روئی کے ٹکڑے سے زیتون کا تیل لگائیں۔ پھر تھوڑی کو ایک پلاسٹک شیٹ سے باندھ لیں ۔ا س پر تولیہ کنکنا گرم کرکے لپیٹ لیں ۔ 45منٹ تک اسی طرح چھوڑ دیں ۔ا س عمل کو بہترین نتائج کے لیے روزآنہ دہرائیں ۔

6۔ جسم کی پوزیشن

ہمارے اٹھنے بیٹھنے کا ڈھنگ ہمارے جسم کی بناوٹ پر گہرا اثرڈالتا ہے ۔ اخبار یا کتاب پڑھتے ہوئے اپنی تھوڑی ہمیشہ سیدھی رکھیں ۔ گردن زیادہ دیر تک جھکا کر مت رکھیں ۔ سر کو بہت زیادہ نیچے یا پیچھے کی طرف جھکانے یا کھینچنے سے تھوڑی کی کھال لٹکنے لگتی ہے ۔ ہمیشہ کمر سیدھی کر کہ بیٹھیں اور کھڑے ہوں ۔ بغیر ہاتھ کا استعمال کیئے فون گردن اور کان کے درمیان نہ رکھیں ۔

7۔ غذاکا انتخاب

وزن بڑھانے والی غذائیں جن میں سوڈیئم ، چینی اور جنک فوڈ شامل ہیں، سے احتیاط کریں۔ تازہ پھل اور سبزیوں کا استعمال کریں ۔ پانی زیادہ پینے سے بھی جلدمیں تناؤ پیدا ہوتا ہے اور وہ لچکدار ہوجاتی ہے ۔ اس کے علاوہ ایسے میں وٹامن ای کا استعمال بھی مفید ہے جیسے کے خشک میوہ جات، گنا، سیب، دودھ سے بنی اشیا، ہری سبزیاں، پھلیاں، براؤن رائس اور موسمبی وغیرہ۔