پاکستان اور ملائیشیا نے سمندری شعبے میں دوطرفہ تعاون کو مزید فروغ دینے کے عزم کا اظہار کرتے ہوئے میرین تربیت، باہمی رابطوں اور تجارتی سرگرمیوں کے نئے فریم ورک پر پیش رفت کا عندیہ دیا ہے۔
لندن میں پاکستان کے وزیرِ بحری امور جنید انوار چوہدری اور ملائیشیا کے نائب وزیرِ ٹرانسپورٹ کے درمیان اہم ملاقات ہوئی، جس میں میری ٹائم تعاون بڑھانے اور میرین ٹریننگ کے فروغ پر تفصیلی گفتگو کی گئی۔
ملاقات کے دوران جنید انوار چوہدری نے پاکستان اور ملائیشیا کے درمیان براہِ راست فیڈر لائنز شروع کرنے کی تجویز پیش کی۔ ان کا کہنا تھا کہ فیڈر لنکس کے قیام سے مال برداری کے اخراجات میں نمایاں کمی آئے گی جبکہ پاکستانی چاول کی برآمدات میں بھی خاطر خواہ اضافہ متوقع ہے۔
دونوں ممالک نے سمندری کیڈٹس کے تبادلے کے لیے مفاہمتی یادداشت پر بھی غور کیا جس کا مقصد میرین تربیت اور ٹیکنیکل مہارت میں اضافہ کرنا ہے۔
وزیرِ بحری امور نے مزید کہا کہ ملائیشیا کراچی کی بندرگاہوں میں نافذ جدید ڈیجیٹل ٹریڈ سسٹمز سے فائدہ اٹھا سکتا ہے، جو خطے میں تجارت کے عمل کو تیز، شفاف اور مؤثر بناتے ہیں۔