قومی اسمبلی کے 6 اور پنجاب اسمبلی کے 7 حلقوں میں ضمنی انتخابات کے لیے پولنگ کا عمل شام 5 بجے مکمل ہوگیا، جس کے بعد ووٹوں کی گنتی جاری ہے۔
لاہور، فیصل آباد، ساہیوال، ڈیرہ غازی خان، سرگودھا، میانوالی، مظفرگڑھ اور ہری پور میں صبح 8 بجے شروع ہونے والی پولنگ مجموعی طور پر پُرامن رہی، البتہ چند مقامات پر بے نظمی کی شکایات سامنے آئیں۔
فیصل آباد کے حلقہ این اے 104 میں معذور میاں بیوی وہیل چیئر پر پولنگ اسٹیشن پہنچے اور اپنا حقِ رائے دہی استعمال کیا۔
سرگودھا میں ایک دلہا اپنی بارات سمیت ووٹ کاسٹ کرنے آیا اور اسسٹنٹ کمشنر کوٹ مومن کے دفتر میں ووٹ ڈالا۔ دلہا کا کہنا تھا کہ بارات لے جانے سے پہلے ووٹ ڈالنا میری قومی ذمہ داری ہے۔
حلقہ پی پی 269، گورنمنٹ گرلز ہائی اسکول کرم داد میں پیپلز پارٹی اور آزاد امیدوار کے کارکنوں میں دھاندلی کے الزامات پر جھگڑا ہوا، جس کے باعث کچھ دیر کے لیے پولنگ کا عمل روکنا پڑا۔
ترجمان الیکشن کمشنر پنجاب کے مطابق تمام پولنگ اسٹیشنز پر فول پروف سکیورٹی کا انتظام تھا۔ موبائل فون اندر لے جانے پر پابندی رہی۔ الیکشن کمیشن اسلام آباد اور پنجاب میں کنٹرول روم قائم کیے گئے۔ مجموعی طور پر 2792 پولنگ اسٹیشنز میں سے 408 کو انتہائی حساس اور 1032 کو حساس قرار دیا گیا۔ 20 ہزار سے زائد سکیورٹی اہلکار تعینات کیے گئے۔
این اے 18 ہری پور میں 9 امیدوار میدان میں ہیں۔ پی ٹی آئی کی حمایت یافتہ آزاد امیدوار، شہرناز، ن لیگ کے بابر نواز خان، پیپلز پارٹی کی ارم فاطمہ
شامل ہیں، مذکورہ نشست پی ٹی آئی کے عمر ایوب کی 9 مئی کیس میں نااہلی کے بعد خالی ہوئی۔
فیصل آباد — این اے 96 پر 16 امیدواروں میں مقابلہ ہے، ن لیگ کے طلال بدر چوہدری آزاد امیدواروں کے مقابلے میں ہیں، مذکورہ نشست پی ٹی آئی کے رائے حیدر علی کھرل کی نااہلی پر خالی ہوئی۔
فیصل آباد — این اے 104 پر (ن) لیگ کے راجہ دانیال اور 4 آزاد امیدواروں میں مقابلہ ہے۔ مذکورہ سیٹ سنی اتحاد کونسل کے چیئرمین حامد رضا کی 9 مئی کیس میں سزا کے بعد خالی ہوئی۔
این اے 185 ڈیرہ غازی خان پر 8 امیدوار آمنے سامنے ہیں، ن لیگ کے محمود قادر لغاری اور پیپلز پارٹی کے سردار دوست محمد کھوسہ میں مقابلہ ہے، مذکورہ نشست سابق وزیر زرتاج گل وزیر کی نااہلی کے باعث خالی ہوئی۔