قومی احتساب بیورو خیبرپختونخوا نے سابق صوبائی وزیر اور وزیراعلیٰ کے سابق معاون خصوصی برائے ہاؤسنگ ڈاکٹر امجد علی سمیت دیگر متعلقہ افسران کے خلاف ذرائع آمدن سے زائد اثاثہ جات کے مبینہ الزامات کی انکوائری باضابطہ طور پر شروع کر دی ہے۔
اس سلسلے میں نیب کی جانب سے خیبرپختونخوا ہاؤسنگ اتھارٹی کے ڈائریکٹر جنرل کو ایک اہم مراسلہ ارسال کیا گیا ہے جس میں 22 ملازمین کے مختلف مالی و انتظامی ریکارڈ فراہم کرنے کی ہدایت کی گئی ہے۔ مراسلے کے مطابق انکوائری قومی احتساب آرڈیننس 1999 کی دفعہ 19 کے تحت جاری ہے۔
نیب نے ہاؤسنگ اتھارٹی سے جن تفصیلات کی فوری فراہمی کا مطالبہ کیا ہے ان میں ملازمین کا سروس ریکارڈ، تنخواہوں کا ریکارڈ، مراعات، ٹی اے/ڈی اے، ہاؤس بلڈنگ اور گاڑیوں کے قرضے، غیر ملکی دوروں کی تفصیلات، تقرری کے نوٹیفکیشن، سلیکشن کمیٹی کے اجلاس کی کاروائی اور آفس آرڈرز شامل ہیں۔
مراسلے میں تنبیہ کی گئی ہے کہ مطلوبہ ریکارڈ چھپانے یا غلط معلومات فراہم کرنے کی صورت میں ذمہ دار افراد کے خلاف قومی احتساب آرڈیننس کے تحت قانونی کارروائی کی جائے گی۔
واضح رہے کہ ڈاکٹر امجد علی ماضی میں محکمہ معدنیات اور محکمہ ہاؤسنگ کے صوبائی وزیر بھی رہ چکے ہیں جبکہ ان کے دورِ وزارت میں مختلف منصوبوں میں بے ضابطگیوں کے الزامات سامنے آتے رہے ہیں۔