سیکیورٹی فورسز نے باجوڑ کی تحصیل ماموند کے علاقے تنگئی میں دہشت گردوں کے بڑے منصوبے کو ناکام بنا دیا۔ کارروائی کے دوران بارود سے بھری گاڑی کو بروقت کارروائی کرتے ہوئے فائرنگ کے ذریعے تباہ کر دیا گیا۔
پولیس کے مطابق اطلاعات موصول ہوئی تھیں کہ فتنہ الخوارج سے وابستہ دہشت گردوں نے بارودی مواد سے بھری ایک گاڑی کو سول آبادی میں دھماکے سے اڑانے کا منصوبہ بنا رکھا تھا۔ سیکیورٹی فورسز نے فوری کارروائی کرتے ہوئے گاڑی کو نشانہ بنایا جس کے نتیجے میں گاڑی مکمل طور پر تباہ ہوگئی۔
خوش قسمتی سے کارروائی کے دوران کوئی جانی نقصان نہیں ہوا۔سیکیورٹی ذرائع کے مطابق فورسز نے مشکوک گاڑی کو بروقت پکڑ کر محفوظ طریقے سے ناکارہ بنا دیا جس سے ممکنہ بڑے سانحے سے بچاؤ ممکن ہوا۔
ذرائع نے مزید بتایا کہ واقعے کے بعد علاقے میں سرچ آپریشن شروع کر دیا گیا ہے جبکہ اسمگلنگ روٹس کی نشاندہی اور دہشت گرد نیٹ ورک کے سہولت کاروں تک رسائی کے لیے تحقیقات بھی جاری ہیں۔