سچ تو یہ ہے(۶۴واں حصہ)

منظر۴۴۸
مولوی صاحب ۔سعیداحمد، کریم بخش راستے سے کچھ فاصلے پرکھیتوں میں بیٹھے ہیں۔
مولوی صاحب۔۔۔۔۔میری ان سے کئی ملاقاتیں ہوچکی ہیں میں نے ان میں ایسی کوئی بات نہیں دیکھی جوپریشانی والی ہو
سعیداحمد۔۔۔۔۔آپ مطمئن ہیں توہم بھی مطمئن ہیں
مولوی صاحب۔۔۔۔آپ کی طرف سے کوئی شرطیں کوئی مطالبے ہیں تووہ بتادیں
کریم بخش۔۔۔۔۔پہلے آپ ان سے یہ معلوم کریں وہ ہمارے ساتھ رشتے کرنابھی چاہتے ہیں ؟ ان سے مطالبات اورشرطیں بھی پوچھ لینا
مولوی صاحب۔۔۔۔۔آپ نے اپنے بیٹوں سے پوچھ لیاہے؟ کہیں ایسانہ ہو میں بات چلاؤں اوروہ انکارکردیں
کریم بخش۔۔۔۔۔۔ہم نے بیٹوں سے تونہیں پوچھا البتہ ان کی ماؤں کے ذمے یہ کام لگادیاہے
مولوی صاحب۔۔۔۔۔یہ آپ نے بہت اچھاکیا
سعیداحمد۔۔۔۔۔ہمیں ان سے کیامطالبات کرنے چاہییں
مولوی صاحب۔۔۔۔۔وہ اپنے قیمتی اثاثے اپنی بیٹیاں تمہیں دے دیں اورکسی چیزکی ضرورت رہتی ہے کیا
کریم بخش۔۔۔۔۔میں آپ کی بات سمجھ گیا ہمیں کوئی مطالبہ نہیں کرناچاہیے
مولوی صاحب۔۔۔۔۔وہ اگرپوچھ لیں توانکارکردینا اور نہ پوچھیں توجب رشتہ طے ہونے لگے توصاف صاف کہہ دینا کہ آپ کوجہیزنہیں چاہیے ہماری بہو کوجس چیزکی خواہش ہوگی وہ ہم خوداسے لے کردیں گے
٭٭٭٭٭٭٭٭٭
منظر۴۴۹
بشیراحمدکے گھرمیں اریبہ اوررحمتاں کرسیوں پربیٹھی ہیں
رحمتاں۔۔۔۔۔یہ سب کیاہوگیاہے
اریبہ۔۔۔۔۔میرے توگمان میں بھی نہیں تھا کہ ایساہوجائے گا
رحمتاں۔۔۔۔۔اس کے باپ کارویہ اب بھی وہی ہے
اریبہ۔۔۔۔ان کوتونہ توکسی کی باتوں پریقین آتاہے اورنہ ہی کسی کی حالت دیکھ کر
رحمتاں۔۔۔۔اب توانہوں نے آنکھوں سے اپنے بیٹے کی حالت دیکھ لی ہے مجھے امیدہے کہ اب اس کارویہ نرم ہوجائے گا
اریبہ۔۔۔۔۔جب احمدبخش سکول سے آیاتھا تب بھی اس نے اپنے بیٹے کی حالت کواپنی آنکھوں سے دیکھاتھا
رحمتاں۔۔۔۔مایوسی کفرہے اﷲ سے بہترکی دعاکرو
اریبہ۔۔۔۔آپ ٹھیک کہتی ہیں
رحمتاں۔۔۔۔۔۔اب سے پہلے عبدالمجیدکی اجازت کے بغیرکچھ نہیں پکایاجاسکتاتھا اب اس نے خود ہی اجازت دے دی ہے دس سالوں سے ان کارشتہ داروں سے کوئی رابطہ نہیں تھا دس سال میں پہلی باراس نے سب رشتہ داروں کی دعوت بھی کردی ہے
اریبہ۔۔۔۔۔یہ سب اس نے فقیرباباکے کہنے پرکیاہے
رحمتاں۔۔۔۔۔کوئی توہے جس کی باتوں پرعبدالمجیدعمل کررہاہے
اریبہ۔۔۔۔اب احمدبخش کاکیاہوگا اس کے باپ اس کے ساتھ وہی سلوک شروع کردیاتو
رحمتاں۔۔۔۔۔کئی دن انتظارکرناچاہیے
اریبہ۔۔۔۔۔ہمیں اپنے مردوں سے بات کرنی چاہیے
رحمتاں۔۔۔۔۔وہ بھی اس بارے آپس میں ضروربات کریں گے
٭٭٭٭٭٭٭٭٭
منظر۴۵۰
سورج غروب ہوچکاہے۔نورالعین سالن تیارکرچکی ہے۔ چولھے سے دیگچی اتارتی ہے۔
نورالعین۔۔۔۔آوازدے کر۔۔۔۔افضل گوندھاہوا آٹالے آ میں روٹیاں لگادوں
اسی دوران دروازے پردستک ہوتی ہے
نورالعین۔۔۔۔۔افضل سے آٹالے کر۔۔۔۔۔دروازے پرجاؤ دیکھو کون آیاہے
افضل یہ کہتے ہوئے دروازے کی طرف چلاجاتاہے بھائی آئے ہوں گے
نورالعین آٹے کے پیڑے بنانے لگ جاتی ہے افضل دروازہ کھولتاہے توسامنے طارق کھڑاہے اس کے ساتھ ایک رکشہ بھی ہے افضل طارق کودونوں ہاتھوں سے سلام کرتاہے
افضل۔۔۔۔۔یہ رکشے میں کیاہے
طارق ۔۔۔۔۔۔یہ گھرکاسامان ہے امی کیاکررہی ہیں
افضل ۔۔۔۔وہ روٹیاں لگارہی ہیں
طارق ۔۔۔۔۔امی سے کہو وہ کمرے میں چلی جائیں ہم یہ سامان گھرمیں رکھ لیں
افضل ۔۔۔۔۔ماں کے پاس آکر۔۔۔۔۔بھائی آئے ہیں آپ کمرے میں چلی جائیں
نورالعین کمرے میں چلی جاتی ہے اوردروازہ بندکرلیتی ہے طارق گھرمیں آتاہے رکشے والارکشہ گھرکے صحن میں کھڑاکردیتاہے طارق اوررکشے والامل کررکشے سے سامان اتارتے ہیں رکشے والارکشہ اسٹارٹ کرلیتاہے
رکشے والا۔۔۔۔۔اب مجھے اجازت
طارق ۔۔۔۔۔کھانے کاوقت ہے کھاناکھاکرجانا
رکشے والا۔۔۔۔۔میرے گھروالے میراانتطارکررہے ہوں گے
طارق۔۔۔۔۔۔ٹھیک ہے رات ہورہی ہے میں تمہیں مجبوربھی نہیں کرسکتا
رکشے والارکشہ لے کرچلاجاتاہے
٭٭٭٭٭٭٭٭٭
منظر۴۵۱
راشدہ کمرے میں احمدبخش کوپیارکررہی ہے اسے دلاسے دے رہی ہے۔
راشدہ۔۔۔۔احمدبخش کوپیارکرتے ہوئے۔۔۔۔۔جوہوناتھا وہ ہوگیا اب اس کوبھول جاؤ ایسے سمجھو کہ کچھ ہواہی نہیں
عبدالمجید۔۔۔۔کمرے کے دروازے میں کھڑے ہوکر۔۔۔۔۔اتنی دیرسے اپنے بیٹے کومیرے خلاف کیاپٹیاں پڑھارہی ہو
راشدہ۔۔۔۔۔میں اس کوسمجھارہی تھی
عبدالمجید۔۔۔۔۔میں اچھی طرح جانتاہوں تواسے کیاسمجھارہی تھی
احمدبخش۔۔۔۔۔بھرائی ہوئی آوازمیں۔۔۔۔۔امی آپ کے خلاف ایک بات بھی نہیں کی
عبدالمجید۔۔۔۔۔میں نے کتنی بارتجھے کہاہے میرے سامنے زبان نہ چلایاکر
راشدہ۔۔۔۔یہ صرف آپ کی غلط فہمی دورکررہاتھا
عبدالمجید۔۔۔۔مجھے کوئی غلط فہمی نہیں ہوئی اس نے ہماراجوتماشا بنایاہے وہ بھی غلط فہمی ہے؟
راشدہ۔۔۔۔۔یہ تماشا اس نے نہیں آپ نے بنایاہے
عبدالمجید۔۔۔۔سارے مہمانوں کے سامنے رونے یہ لگ گیاتھا تماشامیں نے بنایاہے
راشدہ۔۔۔۔۔یہ اتنی دیرسے گھرکی ایک ایک چیزکودیکھ رہاتھا کیاآپ اس کے پاس گئے تھے
عبدالمجید۔۔۔۔۔میں باپ ہوکراس کی منتیں کرتا اس کے سامنے ہاتھ جوڑتا
راشدہ۔۔۔۔اسے میرے ساتھ چچایاچچی کے ساتھ بٹھادیتے اس کوتنہانہ ہونے دیتے
عبدالمجید۔۔۔۔اس کوکیاتکلیف ہوگئی تھی جواس طرح رونے لگ گیاتھا
راشدہ۔۔۔۔۔کمرے کوباہرسے کنڈی دیکھ کراسے وہ سب یادآگیا جواس نے دیکھاتھا آپ کہتے ہیں نا یہ آپ کانافرمان ہے یہ دروازے کی کنڈی خودبھی کھول سکتاتھا یہ چچی سے روتے ہوئے کہتارہا ابوسے کہو کنڈی کھولیں امی کوباہرآنے دیں
٭٭٭٭٭٭٭٭٭
منظر۴۵۲
مقابلے کرانے والی مردوں کی چاروں کمیٹیوں کے ممبران ایک کمرے میں فرش پربچھی ہوئی چادروں پربیٹھے ہیں۔ ایک شخص قرآن پاک کی تلاوت کرتاہے۔ ایک اورشخص علامہ ریاض الدین سہروردی کالکھاہوا نعتیہ کلام سناتاہے ۔ اس کے بعدگفتگوکاسلسلہ شروع ہوتاہے
تنویراحمد۔۔۔۔۔ہم نے جوکام کرناتھا کرلیا اب ہماری ذمہ داری ختم ہوچکی ہے
عمیرنواز۔۔۔۔۔جس مقصدکے لیے ہم نے مشکل آسان فنڈز قائم کیاتھا ہم نے وہ مقصدبھی حاصل کرلیاہے
ناصراقبال۔۔۔۔۔ہم انعامات اورمقابلوں کے ذریعے لوگوں کی مددکرناچاہتے تھے وہ مددبھی کرچکے ہیں
ارشدجمال۔۔۔۔ابھی ہماراکام ختم نہیں ہوا
رشیداحمد۔۔۔۔ابھی مردوں اوربچوں کی مددکرنی ہے
اخترحسین۔۔۔۔۔رشیداحمدٹھیک کہہ رہاہے اب ہم ایک بڑی سی تقریب کریں گے اس سے پہلے قرآن خوانی کرائیں گے
رب نواز۔۔۔۔۔یہ تقریب ہم کب کریں گے
اخترحسین۔۔۔۔آپ ہی مشورہ دیں کہ کب ہونی چاہیے
رشیداحمد۔۔۔۔۔فنڈزبھی اکٹھے کرنے ہیں اورخریداری بھی کرنی ہے
اخترحسین۔۔۔۔دواتوارچھوڑ کرتیسرے اتوارکودن کے دس بجے سے ایک بجے تک انعامات دینے کی تقریب کریں گے
کامران محمود۔۔۔۔۔کل اتوارہے اس طرح توسولہ دن کاوقت ہے تمام انتظامات ہو جائیں گے کیا
اخترحسین۔۔۔۔پندرہ سولہ دن کم ہیں تو اس کے بعدجواتوارآئے گا اس دن تقریب کرلیں
رشدجمال۔۔۔۔اس طرح ہمیں ایک اورہفتہ مل جائے گا
رشیداحمد۔۔۔۔۔تیسرااتوارہی ٹھیک ہے تمام انتظامات آسانی سے ہوجائیں گے
٭٭٭٭٭٭٭٭٭
منظر۴۵۳
جاوید، بشیراحمد اورمولوی صاحب مسجدسے باہرمسجدکی دیوارکے ساتھ کرسیوں پربیٹھے ہیں۔ ان کے سامنے میزپرچائے کے کپ رکھے ہوئے ہیں
جاوید۔۔۔۔۔مولوی صاحب ہم آپ سے ویسے ہی ملناچاہ رہے تھے آپ کاپیغام مل گیا
مولوی صاحب۔۔۔۔آپ کیوں ملناچاہتے تھے پہلے آپ بات کرلیں
بشیراحمد۔۔۔۔۔ہم آپ کے بلانے پرآئے ہیں اس لیے پہلے آپ بات کرلیں
مولوی صاحب۔۔۔۔۔آپ بچیوں کے لیے رشتے تلاشش کررہے تھے اگرآپ دونوں چاہیں تومیں ایک جگہ تمہارے رشتے کراسکتاہوں
جاوید۔۔۔۔۔کون ہیں وہ کیاکرتے ہیں
مولوی صاحب۔۔۔۔۔وہ میں بعدمیں بتاؤں گا تمہاری کوئی شرط کوئی مطالبے ہیں توبتادو
جاوید۔۔۔۔۔ہماری نہ توکوئی شرط ہے اورنہ ہی کوئی مطالبہ ہماری بچیوں نے اپنے دولہوں کے لیے جوخوبیاں بتائی ہیں وہ ان لڑکوں میں ہوں گی توہم رشتہ کرلیں گے
مولوی صاحب۔۔۔۔وہ خوبیاں کیاہیں
بشیراحمد۔۔۔۔۔وہ ہم پہلے ہی آپ کوبتاچکے ہیں
مولوی صاحب۔۔۔۔دونوں گھرانوں میں وہی خوبیاں پائی جاتی ہیں
جاوید۔۔۔۔۔ہم توپریشان تھے ایساگھراس دورمیں کہاں ملے گا
مولوی صاحب۔۔۔۔آپ نے کوئی مطالبہ کوئی شرط نہ رکھ کربہت اچھاکیاہے ہمیں اپنی بچیوں کے رشتے اس طرح ہی کرنے چاہییں
بشیراحمد۔۔۔۔۔لوگ توبڑے بڑے مطالبے کرتے ہیں یہ لاکردو وہ لاکردو یہ لکھ کردو وہ لکھ کردو
مولوی صاحب۔۔۔۔۔دولہاسے حق مہرکے علاوہ کچھ بھی طلب کرنا مانگنا یاوصول کرنارشوت ہے۔ رشوت لینے والا اوردینے والادونوں جہنمی ہیں
جاوید۔۔۔۔۔میں گھرمیں بات کرتاہوں پھرآپ کوجواب دے دوں گا
مولوی صاحب۔۔۔۔۔وہ بھی دوبھائی ہیں آپ مجھ سے کیوں ملناچاہ رہے تھے
بشیراحمد۔۔۔۔ہم گھرمیں بات کرلیں پھربتادیں گے
مولوی صاحب۔۔۔۔۔جوبات کرنی ہے ابھی کرلو
جاوید۔۔۔۔احمدبخش دعوت پراپنے باپ کے گھرگیاتوکمرے کوباہرسے کنڈی دیکھ کراسے وہ سب کچھ یادآگیاجواس نے دیکھاتھا جس کی وجہ سے اس کی حالت خراب ہوگئی اوروہ زاروقطاررونے لگ گیا بڑی مشکل سے اسے چپ کرایا اب اس بچے کاکیاکریں دوبارہ اپنے گھرلے آئیں
مولوی صاحب۔۔۔۔اب اسے اپنے گھرمیں ہی رہنے دو اب جوکریں گے فقیرباباہی کریں گے
٭٭٭٭٭٭٭٭٭
منظر۴۵۴
عبدالمجیداپنے گھر سے کچھ فاصلے پرنئی چارپائیاں بچھاکربیٹھاہے۔ ایک چارپائی پرایک بڑی بالٹی رکھی ہوئی ہے۔ جس کواس نے ایک صاف اورشفاف کپڑے سے ڈھانپ رکھاہے بالٹی کے ساتھ مختلف ڈیزائن کے گلاس رکھے ہوئے ہیں۔ وہ بالٹی سے کپڑااتارکرا س میں پواگھماتاہے۔ پھربالٹی کوکپڑے سے ڈھانپ دیتاہے۔ فقیرباباآجاتاہے۔ عبدالمجیدچارپائی پرٹانگیں لہرائے اپنے دونوں ہاتھ اپنے چہرے پررکھے ہوئے اپنے پاؤں کی طرف دیکھ رہاہے۔
فقیربابا۔۔۔۔السلام علیکم عبدالمجیدصاحب مبارک ہو بلکہ بہت بہت مبارک ہو
عبدالمجید۔۔۔۔وعلیکم السلام باباجی یہ آپ مجھے کس چیزکی مبارک باددے رہے ہیں
فقیربابا۔۔۔۔۔یہ سب کیاہے یہ اتنی چارپائیاں اتنے گلاس آج آپ نے اپنی برادری کوتونہیں بلایاہوا
عبدالمجید۔۔۔۔۔یہ انتظام میں نے آپ کے لیے اورآپ کے ساتھ جومہمان آئیں گے ان کے لیے کیاہے
فقیربابا۔۔۔۔۔آج میرے علاوہ کوئی نہیں آئے گا
عبدالمجید۔۔۔۔۔کھڑے کیوں ہیں بیٹھ جائیں
فقیرباباایک چارپائی پربیٹھ جاتاہے ۔
عبدالمجید۔۔۔۔۔۔ایک گلاس میں بالٹی سے دودھ ڈال کرفقیرباباکوپیش کرتے ہوئے ۔۔۔۔آج کوئی اورنہیں آئے گا مگرکیوں
فقیربابا۔۔۔۔اس لیے کہ میں نے کسی کوآنے کی دعوت ہی نہیں دی تھی
عبدالمجید۔۔۔۔۔میں توسمجھ رہاتھا وہ سب لوگ بھی آئیں گے
فقیربابا۔۔۔۔۔دودھ کے دوگھونٹ بھرکر۔۔۔۔گلاس عبدالمجیدکودیتے ہوئے۔۔۔۔۔اس کوبسم اﷲ شریف اوردرودشریف پڑھ کر پی جاؤ
عبدالمجید۔۔۔۔۔باباجی اوربھی دودھ ہے میں بھی پی لوں گا یہ آپ لیں
فقیربابا۔۔۔۔۔یہ میں بھی جانتاہوں بالٹی میں اورآپ کے گھرمیں اوربھی دودھ بھی موجودہے۔ یہ لودودھ جیسے میں نے کہاہے پی جاؤ
عبدالمجیددودھ کاگلاس پی جاتاہے
فقیربابا۔۔۔۔آج میں نے کسی اورکو اس لیے نہیں بلایا آج میں نے آپ سے رازکی باتیں کرنی ہیں
عبدالمجید۔۔۔۔۔وہ رازکی باتیں کون سی ہیں مجھے کیارازبتانے ہیں
فقیربابا۔۔۔۔۔مجھے ایک اورگلاس میں دودھ ڈال دو
عبدالمجیدایک گلاس میں دودھ ڈال کرفقیرباباکودیتاہے ۔فقیرباباخاموش آوازمیں دعامانگتاہے۔ عبدالمجیدسے کہتاہے یہ دودھ بالٹی میں ڈال کرمجھے دوبارہ اسی گلاس میں ڈال دو عبدالمجیدایسے ہی کرتاہے
فقیربابا۔۔۔۔دودھ کاگلاس لے کر۔۔۔۔۔یہ دودھ کی بالٹی اورگلاس گھردے آؤ سب سے پہلے بچوں کوپلانا اس کے بعدان کی ماں پی لے اس کے بعدگھرمیں جوبھی آئے اس کوپلاتے رہیں
عبدالمجیدبالٹی اورگلاس اٹھاکرچلاجاتاہے اورفقیرباباگلاس میں دودھ پینے لگ جاتاہے۔
٭٭٭٭٭٭٭٭٭