اسلام آباد۔14مئی (اے پی پی):سپیکر قومی اسمبلی سردار ایاز صادق سے اردن کے سفیر معین خراست نے منگل کو پارلیمنٹ ہائوس میں ملاقات کی جس میں دو طرفہ تعلقات سمیت باہمی دلچسپی کے دیگر امور پر تبادلہ خیال کیا گیا۔ سپیکر نے کہا کہ پاکستان اردن کے ساتھ اپنے برادرانہ تعلقات کو بہت اہمیت دیتا ہے، دونوں برادر ممالک کے مابین تعلقات مذہب، اخوت، تاریخ اور ثقافت کی مضبوط بنیادوں پر استوار ہیں، دونوں ممالک اہم علاقائی و عالمی معاملات پر یکساں موقف رکھتے ہیں، دونوں ممالک نے علاقائی و بین الاقوامی فورمز پر ایک دوسرے کے موقف کی ہمیشہ حمایت کی ہے، امہ کو درپیش مسائل کے حل کے لیے تمام مسلم ممالک کے مابین اتحاد بین المسلمین اور قریبی رابطے وقت کی اہم ضرورت ہے، عوامی اور پارلیمانی سطح پر رابطے دونوں ممالک کو قریب لانے میں اہم کردار ادا کر سکتے ہیں۔
سپیکر نے فلسطین میں جاری اسرائیلی بربریت و جارحیت کی پرزور مذمت کی اور کہا کہ عالمی برادری اسرائیل کی جانب سے فلسطین میں جاری ریاستی دہشت گردی اور جارحیت کا نوٹس لے اور فوری خاتمے کے لیے کردار ادا کرے، پاکستان 1967 سے پہلے والی سرحدوں پر آزاد فلسطینی ریاست کے قیام اور یروشلم کو اس کا دارالحکومت بنانے کے اصولی موقف پر قائم ہے۔اردن کےسفیر نے سپیکر قومی اسمبلی کی طرف سے اردن کے لیے نیک خواہشات کے اظہار پر شکریہ ادا کیا اور سردار ایاز صادق کو سپیکر کا عہدہ سنبھالنے پر مبارکباد دی ۔ انہوں نے کہا کہ اردن پاکستان کے ساتھ اپنے برادرانہ تعلقات کو قدر کی نگاہ سے دیکھتا ہے اور اسے مزید وسعت دینے کا خواہشمند ہے۔سفیر نے دونوں ممالک کی مابین تعلقات کو مستحکم بنانے کے لیے پارلیمانوں کے مابین باہمی رابطوں کے فروغ کی تجویز کو سراہا۔