بنجول۔4مئی (اے پی پی):نائب وزیراعظم اور وزیر خارجہ محمد اسحاق ڈار نے گیمبیا کے شہر بنجول میں 15ویں او آئی سی اسلامی سربراہی اجلاس کے موقع پر عرب جمہوریہ مصر کے وزیر خارجہ سامح حسن شکری سے ملاقات کی ۔
دفتر خارجہ کی طرف سے جاری بیان کے مطابق ملاقات میں دونوں ممالک کے وزرا ءنے پاکستان اور مصر کے تعلقات کے مختلف پہلوں پر تبادلہ خیال کیا اور ان تعلقات کو مزید مضبوط بنانے پر زور دیا جن کی خصوصیت مشترکہ عقیدے، ثقافتی وابستگی اور علاقائی اور عالمی مسائل پر مماثلت ہے۔نائب وزیراعظم اور وزیر خارجہ نے غزہ کے لوگوں کو انسانی امداد کی مسلسل فراہمی کو یقینی بنانے میں مصر کے اہم کردار کو سراہا،دونوں فریقوں نے غزہ میں فوری اور غیر مشروط جنگ بندی کی اہمیت کا اعادہ کیا اور غزہ کو انسانی امداد کی بلا تعطل فراہمی پر زور دیا۔