اسلام آباد۔24مارچ (اے پی پی):معروف ماڈل اور اداکارہ مس پاکستان عریج چوہدری نے حکومت سے مطالبہ کیا ہے کہ وہ نایاب سفید ٹائیگر کے بچے کی مناسب پرورش کے ایس او پیزکے بارے میں عوامی آگاہی پیدا کرنے کی کوششوں کو بڑھائے۔
مس پاکستان اور ان کے بھائی شاہ حسن چوہدری حال ہی میں وفاقی دارالحکومت کے پالتو جانوروں کے ہسپتال میں اپنے پیارے نایاب سفید ٹائیگر بچے کی جان سے ہاتھ دھو بیٹھے۔بہترین دیکھ بھال، خوراک اور رہنے کے حالات کے باوجود خلیفہ (ٹائیگر کا بچہ) جینیاتی بیماری کا شکار ہوا اور مر گیا جس نے ہمیں گہرے غم اور صدمے میں چھوڑ دیا۔ انہوں نے کہا کہ حکومت کو چاہیے کہ وہ جنگلی حیات کی بحالی اور ویٹرنری کے لیے ایک وقف مرکز قائم کرے جہاں جنگلی جانوروں کا مناسب علاج اور دیکھ بھال ہو سکے تاکہ کوئی اور اس المناک قسمت اور صدمے کا سامنا نہ کر سکے جس سے ہم گزرے ہیں۔عریج چوہدری نے اپنے پالتو جانور کی المناک موت پر اپنی شدید تشویش کا اظہار کرتے ہوئے اے پی پی سے گفتگو میں انہوں نے کہا کہ سفید شیر بنگال ٹائیگر کی ایک بہت ہی نایاب نسل ہے جس کی مخصوص سفید کھال اسے نارنجی رنگ کے شیروں سے ممتاز بناتی ہے۔عریج چوہدری نے کہا کہ وہ جانوروں کے حقوق کے لیے سرگرم کارکن بھی ہیں اور ہر طرح کے جانوروں پر ظلم کی شدید مذمت کرتی ہیں۔