پاکستان میں جمعرات کے روز عام انتخابات کا عمل مکمل ہونے اور نتائج کی آمد کے آغاز کے بعد پاکستان مسلم لیگ (ن) کا ماڈل ٹاؤن ہیڈکوارٹرز لاہور میں اہم اجلاس شروع ہو گیا ہے۔
مسلم لیگ (ن) کے قائد نواز شریف گنتی کے عمل کے آغاز کے بعد اپنے بھائی اور پارٹی کے صدر شہباز شریف اور بیٹی مریم نواز کے ہمراہ ماڈل ٹاؤن دفتر پہنچے جس کے بعد ان کی سربراہی میں مشاورتی اجلاس کا آغاز ہوا۔ اجلاس میں انتخابی نتائج آنے کے بعد کی صورت حال کے مختلف پہلوؤں پر تبادلہ خیال کیا جا رہا ہے۔ ذرائع کے مطابق مسلم لیگ (ن) کی قیادت پُرامید ہے کہ تمام نشستوں کے نتائج آنے کے بعد پارٹی واضح برتری اور اکثریت لے گی، تاہم ابھی نتائج کے مکمل ہونے کا انتظار ہے۔ابھی تک الیکشن کمیشن آف پاکستان کی طرف سے کوئی نتیجہ جاری نہیں کیا گیا، تاہم غیر حتمی اور غیر سرکاری نتائج کے مطابق ملک کے کئی حلقوں میں مسلم لیگ (ن) کے امیدوار دوسرے امیدواروں سے آگے ہیں۔