پنجاب پولیس آرڈر 2002ء میں ترمیم کردی گئی ہے، جس کی منظوری گورنر پنجاب سردار سلیم حیدر نے دے دی ہے۔ ترمیم شدہ قانون کے تحت فسادات اور پرتشدد احتجاج میں ملوث افراد کو 10 سال قید اور 5 لاکھ روپے تک جرمانے کی سزا دی جا سکے گی۔
پولیس حکام کے مطابق نئے قانون میں پرتشدد ہجوم کے رویے کو قابلِ دست اندازی پولیس اور ناقابلِ ضمانت جرم قرار دے دیا گیا ہے۔ اب پرتشدد احتجاج سے متعلق مقدمات کا ٹرائل سیشن کورٹ میں ہوگا۔
حکام کا کہنا ہے کہ قانون میں ’’رائٹ زون‘‘ کا نفاذ کرکے پولیس کارروائی کو قانونی تحفظ فراہم کر دیا گیا ہے، جبکہ پرتشدد احتجاج کے منتظمین اور شرپسند عناصر کے لیے سخت سزاؤں کا واضح تعین بھی کردیا گیا ہے۔
پولیس حکام کے مطابق ان ترامیم کا مقصد امن و امان کی صورتحال کو بہتر بنانا اور پرتشدد سرگرمیوں کی حوصلہ شکنی کرنا ہے۔