یار تجھ کو مرا خیال تو ہے

یار تجھ کو مرا خیال تو ہے
عشق میں اتنی دیکھ بھال تو ہے

غم نہیں گر خوشی نہیں حاصل
فرقت دوست کا ملال تو ہے

تجھ پہ گزری ہے کیا خبر ہے مجھے
تیرے جیسا ہی میرا حال تو ہے

میرا حامی جہاں نہیں تو کیا
شکر ہے رب ذو الجلال تو ہے

ہے اگر زعم برتری تم کو
یہ بھی اک صورت زوال تو ہے

میرے پہلو میں تو نہیں نہ سہی
میرے شانے پہ تیری شال تو ہے

زندگی میں یہی تمنا تھی
دم آخر ترا وصال تو ہے

اس کی تمثیل ہی نہیں ہے اسدؔ
میرا محبوب بے مثال تو ہے