نہ خط لکھوں نہ زبانی کلام تُجھ سے رہے

نہ خط لکھوں نہ زبانی کلام تُجھ سے رہے
خموشیوں کا یہی اِنتقام تجھ سے رہے

رہے بس اتنا شناسائی کا بھرم باقی
اشارتً ہی دعا و سلام تُجھ سے رہے

نہ عہدِ ترکِ تعلق ، نہ قربتیں پیہم
بس ایک ربطِ مسلسل ، مدام تجھ سے رہے

یہی رہیں ترے نشتر ، ترا طریقِ علاج
اسی طرح غمِ دل کو دوام تجھ سے رہے

نظر میں عکس فشاں ہو ترے جمال کی دھوپ
دیارِ جاں میں سدا رنگِ شام تجھ سے رہے

اب اس سے بڑھ کے مجھے چاہئے بھی کیا آخر
دیارِ فن میں اگر میرا نام تجھ سے رہے