تیرے حسن سخاوت کیتی(پنجابی)

باہروں شہد نتھارے لوک
اندروں کنے کھارے لوک

گلاں گزرے پل دیاں کر کے
دیون پینگ ہلارے لوک

آپنے دل دا چن نہ ویکھن
توڑ لیاون تارے لوک

مٹی تھلے ہتھیں دبے
سفنیوں ود پیارے لوک

میں اوتھے دا اوتھے رہ گیا
لا لا ٹر گئے لارے لوک

سپاں نے تے کیہ لڑنا سی
لڑ گئے پھن کھلارے لوک

تیرے حسن سخاوت کیتی
جت گئے نیں ہارے لوک

ساہنواں دی سولی تے چڑھ گئے
ویکھو ویکھی سارے لوک

ساڈی کلی دے وچ بہہ کے
لبھن محل منارے لوک

ہر جا ویکھے مجنوں صورت
تیرے پیار دے مارے لوک