گلزارِ درد

کون کہتا ہے مے کشی ہے حرام
یہ سنا تھا کہ بے خودی ہے حرام

کس طرح لوگ خون پیتے ہیں
آدمی پر تو آدمی ہے حرام

یوں رہا ملنے سے خدا تم کو
عشق نہ ہو تو بندگی ہے حرام

آج سرخی لگائی ہے اس نے
میرے ہونٹوں پہ تشنگی ہے حرام

ایک پل چین کا نہیں ملتا
عاشقی میں تو زندگی ہے حرام

تم سے مل کر مجھے خوشی ہے وہ !
مر نہ جاؤں کہ خودکشی ہے حرام

تیری آنکھوں سے یہ ہوا معلوم
کس لیے مےکشی ہوئی ہے حرام

گھر کے سارے چراغ گُل کر دو
شبِ فرقت میں روشنی ہے حرام

تیوری کیوں چڑھائی ہے تم نے
حسن والوں پہ بے رخی ہے حرام

صرف ذکرِ شباب اور ساغر
دردؔ تیری تو شاعری ہے حرام