لوٹ آنا

اداس شامیں اجاڑ رستے کبھی بلائیں تو لوٹ آنا
کسی کی آنکھوں میں رتجگوں کے عذاب آئیں تو لوٹ آنا

ابھی نئی وادیوں نئے منظروں میں رہ لو مگر میری جاں
یہ سارے اک ایک کر کےجب تم کو چھوڑ جائیں تو لوٹ آنا

جو شام ڈھلتے ہی اپنی اپنی پناہ گاہوں کو لوٹتے ہیں
اگر وہ پنچھی کبھی کوئی داستاں سنائیں تو لوٹ آنا

گئے زمانوں کا کرب اوڑھے ضعیف لمحے نڈھال یادیں
تمہارے خوابوں کے بند کمروں میں لوٹ آئیں تو لوٹ آنا

اگر اندھیروں میں چھوڑ کر تم کو بھول جائیں تمہارے ساتھی
اور اپنی خاطر ہی اپنے اپنے دیئے جلائیں تو لوٹ آنا

میں روز یوں ہی ہوا پہ لکھ لکھ کہ اسکی جانب یہ بھیجتا ہوں
کہ اچھے موسم گر پہاڑوں پہ مسکرائیں تو لوٹ آنا

میری وہ باتیں جن پہ تو کبھی ہنستی تھی کھلکھلا کر
بچھڑنے والی میری وہ باتیں کبھی رلائیں تولوٹ آنا