ایک بھولی سی صدا ہوں ۔۔ ۔ ۔۔

ایک بھولی سی صدا ہوں یاد نہ آؤں تو کیا
میں جو آؤں بھی تو کیا اور لوٹ بھی جاؤں تو کیا

بے اثر سنگیت میرا ، بے اثر میرے سخن
تیری محفل میں ترانے پیار کے گاؤں تو کیا

آرزو کب سے بہار نو کی ہے مجھ کو مگر
خار جب ٹھہرے مقدر باغ مہکاؤں تو کیا

ایک مدت سے کسی کی جستجو میں ہے سفر
دل تو گھائل ہے جو گھائل ہو گئے پاؤں تو کیا

جب حقیقت تلخیاں لے آئی میرے سامنے
اپنی آنکھوں کو سہانے خواب دکھلا ؤں تو کیا

نا امیدی کے سوا اب زیست میں کچھ بھی نہیں
دل بہلتا ہی نہیں اس دل کو بہلا ؤں تو کیا

بھولنے کی کوششیں کچھ کام نہ یوں آئیں گی
جام اس کی یاد میں ہر شام چھلکاؤں تو کیا