سندھ سے ٹماٹر کی فصل بازار میں آتے ہی قیمتیں شدید کمی کا شکار ہو گئیں۔ 15 روز قبل کراچی میں ٹماٹر 500 روپے فی کلو میں فروخت ہو رہا تھا، جو اب محض 50 روپے فی کلو میں دستیاب ہے۔
ماہرین کا کہنا ہے کہ کوئٹہ کی فصل ختم ہونے اور سندھ کی فصل شروع ہونے کے درمیان تقریباً ایک ماہ کا وقفہ آیا، جس دوران محدود سپلائی کی وجہ سے قیمتیں بڑھ گئی تھیں۔ لیکن سندھ کی بڑھتی ہوئی پیداوار کے باعث بازار میں فراوانی پیدا ہوگئی ہے۔
اعداد و شمار کے مطابق 14 کلو ٹماٹر کی پیٹی آج 600 روپے میں فروخت ہوئی، جس میں کسان کا حصہ صرف 100 روپے بنتا ہے۔ ماہرین کے مطابق پیداوار بڑھنا کسان کے لیے تباہی کا سبب بن رہا ہے اور سپلائی بڑھنے کے ساتھ قیمتیں مزید کم ہونے کا امکان ہے۔
ماہرین کا کہنا ہے کہ اس چکر سے نکلنے کا واحد راستہ ویلیو ایڈیشن اور مضبوط سپلائی چین ہے۔ حکومت کی خواہش ہے کہ برآمدات میں اضافہ ہو، لیکن پیداوار سے صارف تک سپلائی چین کی ہر کڑی پر توجہ دینا ضروری ہے۔