خیبر کے علاقے باڑہ میں ایک گھر کے اندر ہینڈ گرنیڈ پھٹنے سے تین افراد جاں بحق جبکہ ایک شخص زخمی ہوگیا۔
پولیس کے مطابق دھماکا تھانہ باڑہ کی حدود ملک دین خیل کے نواحی علاقے نالہ میں پیش آیا جہاں ایک مکان کے اندر اچانک دستی بم پھٹ گیا۔دھماکے کے نتیجے میں 60 سالہ دولت ولد خان میر، 39 سالہ رحمت اللہ ولد گلستان اور 37 سالہ ہارون ولد گل مت شاہ موقع پر جاں بحق ہوگئے، جبکہ 15 سالہ حبیب اللہ شدید زخمی ہوا۔
زخمی کو ابتدائی طبی امداد کے بعد تشویشناک حالت میں پشاور منتقل کردیا گیا۔دوسری جانب ایس ایچ او تھانہ باڑہ نے بتایا کہ واقعے کی تحقیقات شروع کر دی گئی ہیں تاکہ دھماکے کی نوعیت اور محرکات کا تعین کیا جا سکے۔
پولیس نے جائے وقوع کو گھیرے میں لے کر شواہد اکٹھے کر لیے ہیں، جب کہ دھماکے کی وجوہات کا تعین تفتیش مکمل ہونے کے بعد کیا جائے گا۔