دہشت گرد کون؟

اقوام متحدہ کے حالیہ بیان کے مطابق پہلے 3 سالہ عراق جنگ میں ایک لاکھ اکیاون ہزار (151,000) سے زائد عراقی شہری ہلاک ہوچکے ہیں-(یہ تعداد جاپان پر گرائے جانے والے ایٹم بم سے بھی کہیں زیادہ ہے)- 11 ستمبر 2001 کے واقعہ کو وجہ بنا کر افغانستان پر حملے کا جواز تو امریکہ کے پاس موجود تھا لیکن عراق کا کیا قصور؟

دنیا کی مہذب اقوام کہلانے والے یورپ کو تو چھوڑیے کسی ایک مسلمان ملک کی طرف سے بھی اس رپورٹ پر کوئی بیان نہیں آیا-افسوس کے مسلمان حکمرانوں کے ساتھ عوام کی بے حسی بھی اپنے عروج پر پہنچ چکی ہے-

تاریخ کو پلٹ کر دیکھیں تو ایک ایسا ہی حملہ عراق پر چنگیز اور ہلاکو خان کا بھی تھا جس میں مسلمانوں کی غیرت یہاں تک ختم ہوچکی تھی کہ مسلمان نوجوانوں کو ہلاکو خان کی فوجیں بیچ چوراہے میں سرِعام قتل کرتیں اور خواتین کی عصمت دری کی جاتی- اگر کوئی اِکا دُکا کچھ کرنے کے لیے آتا تو وہ بھی ہلاک کر دیا جاتا جبکہ دیگر لوگ بزدلی و بے حسی میں تماشا دیکھتے- اور یہی سوال اٹھتا کہ ہم کیا کر سکتے ہیں؟ حملہ آور فوج صرف 70 ہزار جبکہ بغداد میں مسلمانوں کی تعداد پانچ لاکھ سے زائد تھی-

اقوام متحدہ٬ اسلامی ممالک کی تنظیم٬ انسانی حقوق کی تنظیمیں یہ سب کہاں ہیں؟ بحیثیتِ مسلمان ہمارا اپنا رول کیا ہے؟ کیا اس خبر کے بعد ہمارے دل کو ذرا سی بھی ٹھیس پہنچی؟ اگر جواب "ہاں" میں ہے بھی تو سوال وہی ہوگا جس طرح ہلاکو خان کی تباہ کاریوں پر مسلمانوں کا تھا کہ "ہم کیا کر سکتے ہیں"؟