اسلام آباد کا معروف غریب پرور ڈھابہ٬ نوجوان نے لاکھوں کی نوکری چھوڑ کر ڈھابے کو مستقبل بنا لیا

اعلیٰ تعلیم یافتہ نوجوان نے نوکری چھوڑ کر اپنی ہی یونیورسٹی میں ڈھابہ چلانا شروع کردیا، انیس مجید نے لاکھوں روپے کی نوکری کیوں چھوڑی اور مستقبل کا کیا ارادہ ہے- انیس مجید کی دلچسپ کہانی انہی کی زبانی سنتے ہیں-

سوال: کیا آپ نے اعلیٰ تعلیم حاصل کرنے کے بعد کہیں نوکری کی یا یہی کام کرتے رہے؟

انیس مجید: میں نے تعلیم مکمل کرنے کے بعد 3 سال تک نوکری کی نوکری کا تجربہ بھی بہت اچھا رہا لیکن بعد میں اپنے اس کام سے منسلک ہوگیا-

سوال: ایک بہترین نوکری چھوڑ کر ڈھابہ چلاتے ہوئے کیسا محسوس ہوتا ہے؟

انیس مجید: یہ ڈھابہ ہمارے والد صاحب نے قائم کیا تھا ہم بھی برسوں سے اس ڈھابے سے منسلک رہے اس ہوٹل کو چلانا اور یہاں خود کام کرنا ہمارے لئے خوش کا باعث ہے- نوکری اور اپنے کام میں بہت فرق ہے لیکن اس کام سے ہمیں دلی لگاؤ ہے-

سوال: یہاں ہر طبقہ موجود ہے، کیا ہم اس غریب پرور ڈھابہ کہہ سکتے ہیں؟

انیس مجید: یہاں کھانے اسلام آباد کے دوسرے علاقوں کی نسبت بہت کم ہیں ہمارے پاس عام طور پرطلبہ کھانا کھانے کیلئے آتے ہیں قیمتیں بھی اسی مناسب سے رکھی ہیں تاکہ طلبہ کو سستا اور معیاری کھانا مل سکے-

سوال: ایک اچھی نوکری چھوڑ کر یہاں کام شروع کرتے ہوئے کیسا محسوس ہوا؟

انیس مجید: دفتر میں ہر چیز ایک وقت کے ساتھ ہوتی ہے یہاں ڈھابہ سنبھالنے میں شروع میں تھوڑی مشکل پیش آئی ہم کافی وقت سے والد صاحب کے ساتھ کام کرتے اور دیکھتے رہے ہیں- پریکٹس ہونے کی وجہ سے مشکلات پر جلدی قابو پا لیا-

سوال: کھانوں کیلئے سامان کی خریداری کون کرتا ہے؟

انیس مجید: سامان کی خریداری ہم خود کرتے ہیں-

سوال: صبح کتنے بجے کام شروع کرتے ہیں اور کب تک کام ہوتا ہے؟

انیس مجید: صبح 7 بجے آتے ہیں اور رات 11 بجے تک جاتے ہیں-

سوال: طویل ڈیوٹی میں کوئی وقفہ بھی لیتے ہیں؟

انیس مجید: یہ بھاگ دوڑ والا کام ہے،جسمانی مشقت بہت زیادہ ہے درمیان میں کہیں موقع ملے تو تھوڑا آرام بھی کرلیتے ہیں-

سوال: کیا آپ نے والد صاحب کی خواہش پر ڈھابہ سنبھالا ہے؟

انیس مجید: میرے والد صاحب نے 40 سال لوگوں کی خدمت کی- والد صاحب کی خواہش تھی کہ ہم اس کام کو آگے بڑھائیں اور اس میں جدت لائیں ہمیں خوشی ہے کہ ہم اس کو اچھے انداز میں چلا رہے ہیں-

سوال: کیا آپ کے بچے بھی اس کاروبار کو سنبھالیں گے؟

انیس مجید: ہر انسان کی اپنی خواہشات ہوتی ہیں بچے یہ کاروبار سنبھالیں گے یا نہیں یہ وقت کے ساتھ پتا چلے گا-

سوال: اعلیٰ تعلیم کے بعد نوکری کی تلاش میں پھرنے والوں کو کیا مشورہ دیں گے؟

انیس مجید: ہمارے معاشرے میں لوگ تعلیم کے بعد نوکری کو ترجیح دیتے ہیں اپنا کام یا کاروبار کرنے کا رجحان بہت کم ہے پڑھے لکھے لوگ جب کوئی کاروبار کرتے ہیں تو اپنے ساتھ دوسروں کو بھی فائدہ ہوتا ہے تعلیم یافتہ لوگوں کے میدان میں آنے سے روزگار کے مواقع پیدا ہوتے ہیں- ملک و معاشرے کی ترقی کی راہ بھی ہموار ہوتی ہے-

اس غریب پرور ڈھابے پر کم پیسوں میں لوگ پیٹ بھرکر کھانا کھا سکتے ہیں اس ڈھابے پر مختلف اقسام کے کھانے بہت مناسب پیسوں میں مل جاتے ہیں-

< Previous پاکستانی والدین کے بچوں کو ڈرانے کے چند دلچسپ انداز NEXT > کچھ تو گڑبڑ چھپی ہے، ان تصاویر میں موجود غلطیاں ڈھونڈنے والا سوپر سے بھی اوپر ذہین قرار - جوابات