امریکی کانگریس میں پیش کی گئی رپورٹ میں واضح کیا گیا ہے کہ پاکستان نے مئی 2025 میں پاک بھارت 4 روزہ جھڑپ میں بھارت پر واضح برتری حاصل کی۔ رپورٹ کے مطابق پاکستان کی فتح میں چین کے جدید ہتھیار اور ٹیکنالوجی کلیدی کردار ادا کر رہے تھے جن میں HQ-9 میزائل دفاعی نظام، PL-15 ایئر ٹو ایئر میزائلز اور J-10 لڑاکا طیارے شامل ہیں۔
رپورٹ میں بتایا گیا کہ پاکستان نے چینی ہتھیاروں کی مدد سے بھارتی رافیل طیارے مار گرائے اور 109 فوجی اہداف کو کامیابی سے نشانہ بنایا۔ اس کامیابی کے بعد چین نے پاکستان کو مزید جدید J-35 لڑاکا طیارے، KJ-500 ایئرکرافٹ اور بیلسٹک میزائل دفاعی نظام فراہم کرنے کی پیشکش کی۔
رپورٹ میں یہ بھی کہا گیا کہ مئی 2025 کی جھڑپ میں پاکستان کی فتح نے چین کے ہتھیاروں کی عملی کارکردگی کو دنیا کے سامنے ثابت کیا اور عالمی سطح پر اسلحے کی فروخت کے لیے مضبوط دلیل فراہم کی۔ رپورٹ کے مطابق بھارت نے خود بھی تسلیم کیا کہ پاکستان نے جنگ میں 109 اہداف کامیابی سے نشانہ بنائے اور چین نے اس دوران براہِ راست پاکستان کی حمایت کی۔
رپورٹ میں 2024 اور 2025 میں چین اور پاکستان کے درمیان ہونے والی مشترکہ عسکری مشقوں کا بھی ذکر کیا گیا جن میں انسدادِ دہشت گردی ڈرلز اور کثیرالملکی امن مشقیں شامل تھیں جنہوں نے خطے کی اسٹریٹجک صورتِ حال پر اثر ڈالا۔