برطانوی بری فوج کے چیف آف جنرل اسٹاف جنرل سر رالف واکر نے جی ایچ کیو راولپنڈی کا دورہ کیا اور پاک فوج کے سربراہ فیلڈ مارشل سید عاصم منیر سے ملاقات کی۔
پاک فوج کے شعبہ تعلقات عامہ کے مطابق ملاقات میں علاقائی سلامتی، باہمی دلچسپی کے امور اور دفاعی تعاون کے فروغ پر تفصیلی تبادلہ خیال کیا گیا۔
دونوں رہنماؤں نے خطے میں امن و استحکام کے قیام کے لیے مشترکہ تعاون جاری رکھنے کے عزم کا اعادہ کیا۔دورے پر آئے برطانوی جنرل نے دہشت گردی کے خلاف جنگ میں پاک فوج کی قربانیوں اور کامیابیوں کو سراہا اور خطے میں امن کے لیے پاکستان کے کردار کی تعریف کی۔
اس سے قبل جی ایچ کیو پہنچنے پر جنرل سر رالف واکر کو پاک فوج کے چاق و چوبند دستے نے گارڈ آف آنر پیش کیا۔انہوں نے یادگارِ شہداء پر پھول چڑھائے اور وطن کے لیے جان قربان کرنے والے شہداء کو خراجِ عقیدت پیش کیا۔