وفاقی وزیر داخلہ محسن نقوی نے مفتی اعظم پاکستان مفتی منیب الرحمن کی رہائش گاہ پر ملاقات کی، جہاں ممتاز علمائے اہلسنت کے ساتھ اہم بیٹھک ہوئی۔
وزیر داخلہ کے ہمراہ سندھ کے سینئر وزیر شرجیل انعام میمن اور صوبائی وزیر سید ناصر حسین شاہ بھی موجود تھے۔ ملاقات میں حالیہ واقعات اور مذہبی ہم آہنگی سے متعلق امور پر تفصیلی تبادلہ خیال کیا گیا۔
علمائے کرام نے مختلف مذہبی و سماجی مسائل پر اپنا موقف پیش کیا، جسے وزیر داخلہ محسن نقوی نے غور سے سنا اور تمام جائز مسائل کو ترجیحی بنیادوں پر حل کرنے کی یقین دہانی کرائی۔
محسن نقوی نے کہا کہ مدارس و مساجد کے انتظامی امور میں حکومت کوئی مداخلت نہیں کرے گی، جبکہ فریقین کے درمیان مستقل رابطے کے لیے ایک فوکل پرسن بھی مقرر کیا جائے گا۔
فریقین کے درمیان جلد ہی اسلام آباد میں ایک تفصیلی نشست کے انعقاد پر بھی اتفاق کیا گیا تاکہ تمام معاملات کو باہمی مشاورت سے حل کیا جا سکے۔
ملاقات میں شریک علمائے کرام میں علامہ سید مظفر شاہ، مفتی عابد مبارک، علامہ لیاقت حسین اظہری، علامہ ریحان اظہر نعمانی، مفتی رفیع الرحمن نورانی، علامہ اشرف گورمانی اور علامہ احمد ربانی شامل تھے۔