اسلام آباد۔20مئی (اے پی پی):سپیکر قومی اسمبلی سردار ایاز صادق نے ایرانی صدر کے ہیلی کاپٹر کو پیش آنے والے حادثے کے نتیجے میں صدر سید ابراھیم رئیسی، ایرانی وزیر خارجہ اور ہیلی کاپٹر میں سوار دیگر رفقاء کے انتقال پر گہرے دکھ اور افسوس کا اظہار کیاہے۔ قومی اسمبلی سیکرٹریٹ سے جاری بیان کے مطابق اپنے تعزیتی پیغام میں سپیکر نے کہا کہ دکھ کی اس گھڑی میں ایرانی پارلیمان، حکومت اور عوام سے یکجہتی کا اظہار کرتے ہیں۔ صدر ابراہیم رئیسی انتہائی مدبر، شفیق، دوراندیش اور نرم گو رہنما تھے۔انہوں نے کہاکہ صدر ابراہیم رئیسی کا انتقال پورے عالم اسلام کے لئے ناقابل تلافی نقصان ہے،صدر ابراہیم
رئیسی کے انتقال سے پاکستان ایک مخلص دوست سے محروم ہو گیا ہے۔ صدر ابراہیم رئیسی کے حالیہ دورہ پاکستان کے دوران ان سے ہونے والی ملاقات بڑی مفید رہی تھی ۔ صدر رئیسی خطے کی ترقی اور خوشحالی کے داعی تھے۔ انہوں نے کہا کہ اتحاد بین المسلمین کے فروغ کے لیے صدر ابراہیم رئیسی کی خدمات کو خراج تحسین پیش کرتا ہوں، مشکل گھڑی میں ایرانی پارلیمان، حکومت اور عوام کے ساتھ کھڑے ہیں اور ان دکھ میں برابر کے شریک ہیں،سید محمد ابراہیم رئیسی کے انتقال سے پیدا ہونے والا خلاء مدتوں پر نہیں ہو سکے گا، سید محمد ابراہیم رئیسی کا حالیہ دورہ پاکستان ہمیشہ یاد رکھا جائے گا، سید محمد ابراہیم رئیسی نے اپنے دورے کے دوران پاکستانی عوام کے ساتھ جس محبت اور بھائی چارے کا اظہار کیا وہ ہر پاکستانی کے دل ہمیشہ نقش رہے گا، سید محمد ابراہیم رئیسی کے دورہ پاکستان نے دونوں ممالک کے تعلقات کو دوام بخشا۔ انہوں نے کہا کہ پاکستان کی عوام اور پارلیمان سید محمد ابراہیم رئیسی کے انتقال پر غمزدہ ہے، سپیکر نے ایرانی وزیر خارجہ عبد اللہیان کے انتقال پر بھی گہرے دکھ اور افسوس کا اظہار کیا ہے۔سپیکر نے مرحوم کے اہلخانہ سے دلی تعزیت اور ہمدردی کا اظہار کیا ہے۔سپیکر نے پاکستان اور ایران کے مابین پارلیمانی سطح پر رابطوں کو فروغ دینے کیلئے ایرانی وزیر خارجہ کی خدمات کو خراج تحسین پیش کیا۔ ایرانی وزیر خارجہ کی دوطرفہ تعلقات کو مزید مستحکم بنانے کیلئے کاوشیں قابل ستائش تھیں۔ سپیکر نے اللہ تعالیٰ سے سید محمد ابراہیم رئیسی اور دیگر شہدا کے درجات کی بلندی ،ان کے خاندانوں اور ایرانی عوام کو اس ناقابل تلافی نقصان کو برداشت کرنے کے لیے صبر جمیل کی دعا کی۔\