اسلام آباد ۔14مئی (اے پی پی):تلور کے شکار کیلئے زمین الاٹمنٹ کیس کی سماعت 17 مئی کو چیف جسٹس قاضی فائز عیسیٰ کی سربراہی میں تین رکنی بنچ کرے گا۔سپریم کورٹ میں تلور کے شکار کیلئے زمین کی الاٹمنٹ کا کیس سماعت کیلئے مقرر کر دیا گیا ہے۔ سپریم کورٹ کی جانب سے جاری کاز لسٹ کے مطابق چیف جسٹس قاضی فائز عیسیٰ کی سربراہی میں جسٹس عرفان سعادت خان اور جسٹس نعیم اختر افغان پر مشتمل تین رکنی بنچ 17 مئی 2024ء کو اپیلوں پر سماعت کرے گا۔
بلوچستان ہائی کورٹ کے فیصلہ کے خلاف صوبائی حکومت کی جانب سے اپیلیں دائر کی گئی تھیں۔ واضح رہے کہ 2015ء میں سپریم کورٹ نے تلور کے شکار پر پابندی عائد کر دی تھی جبکہ نظرثانی درخواستوں میں لارجر بنچ نے تلور کے شکار پر پابندی کا فیصلہ کالعدم قرار دے دیا تھا۔