وفاقی وزیر داخلہ محسن نقوی نے کہا ہے کہ امریکا اور ایران کے درمیان جاری کشیدگی کے خاتمے اور ممکنہ امن معاہدے کے حوالے سے آئندہ ایک دو روز میں مثبت پیش رفت سامنے آنے کی توقع ہے۔
لاہور میں صحافیوں سے غیر رسمی گفتگو کرتے ہوئے محسن نقوی کا کہنا تھا کہ امریکا اور ایران کے درمیان تنازع کا حل جلد نکل آئے گا اور دونوں ممالک کے درمیان صلح ہونے کا امکان ہے۔
انہوں نے کہا کہ متوقع معاہدے کے سلسلے میں پاکستان بھی اہم کردار ادا کر رہا ہے اور وزیر اعظم شہباز شریف اور فیلڈ مارشل پاکستان کی نمائندگی کریں گے۔
وزیر داخلہ نے ملک میں پیٹرولیم مصنوعات کی قیمتوں سے متعلق گفتگو کرتے ہوئے کہا کہ حکومت نے تیل کی قیمتوں کو باقاعدہ منصوبہ بندی کے تحت مستحکم رکھا ہے۔ ان کے بقول اگر بروقت اقدامات نہ کیے جاتے تو پیٹرول کی قیمت میں ایک ہی وقت میں ڈھائی سو روپے تک اضافہ ہو سکتا تھا۔