اسلام آباد ہائیکورٹ نے پاکستان ٹیلی کمیونیکیشن اتھارٹی کے چیئرمین کو عہدے سے ہٹانے کے سنگل بینچ کے فیصلے کو معطل کرتے ہوئے انہیں فوری طور پر عہدے پر بحال کرنے کا حکم جاری کر دیا۔
چیئرمین پی ٹی اے کی برطرفی کے خلاف دائر انٹراکورٹ اپیل پر دو رکنی بینچ نے سماعت کی۔ فریقین کے دلائل سننے کے بعد عدالت نے سنگل بینچ کا فیصلہ معطل کر دیا۔
واضح رہے کہ اسلام آباد ہائیکورٹ کے سنگل بینچ نےچیئرمین پی ٹی اے کو عہدے سے ہٹانے کا حکم دیا تھا جس کے خلاف اپیل دائر کی گئی تھی۔ اپیل کنندہ کے وکیل نے مؤقف اختیار کیا کہ برطرفی غیر قانونی اور قواعد کے برعکس ہے۔
عدالت نے چیئرمین پی ٹی اے کو عہدے پر بحال کرنے کے ساتھ ساتھ فریقین کو نوٹس جاری کرتے ہوئے آئندہ سماعت پر تفصیلی دلائل طلب کرلیے ہیں۔